Vawiin chawhnu khan Ramhlun Indoor Stadium-ah ni 2 chhung awh 6th Mizoram Inter School Chess Championship -2017 chu a tiak a. He hun hi School Education Minister Pu.H.Rohluna chuan khuallian niin a hmanpui.
School naupangte fuihna thu sawiin Pu H. Rohluna, School Education Minister chuan mihring thanlenna leh puitlinna kawnga a pawimawh ber pakhat chu zirna a ni tih sawiin zirlai naupang te chu engkawng pawh zawh dawn se an zirna an dah pawimawh hmasak ber zel a ngai a ni a ti. Zirna tih chuan lehkhazir chauh a huam loh thu leh Zirna thiltum chu a thalam hawi zawnga kawng tinrenga puitlinna a ni a ti a. Taksa insawizawi leh thluak sawizawite chu zirlai ten lehkhazir ruala thanlen nana an mamawh a ni a ti a. Chess khelh phei chu thluak sawizawi nan bakah lehkha zirna kawng tangkai tur leh rilru chakna hmanrua a nih avangin sikul naupang tam zawk te pawhin uar se a duh tih a sawi a. Infiamna khawvelah emaw zirna kawnga inelna kawngah pawh nise Mizo naupang tan chuan zonunmawi- aia upa zah, nu leh pa thuawih bakah zirtirtute thuzawm chunga an thanlen a pawimawh ber a ni a ti.
Mizoram Chess Association buatsaih 6th Mizoram Inter School Chess Championship -2017 ah hian School 18 atangin zirlai 194 - Higher Secondary Section zirlai 37, High School Zirlai 46, Middle school Zirlai 90 leh Elementary School zirlai 21 ten Chess an inthiamsiak a. Elementary School Section ah Vanlalruatpuia, Tuikual Presbyterian English School, Middle School Section ah Lalfakzuala, Modern Middle English School, Reiek, High School Section ah Lalnghilhlova, Sailothanga High School, Lungtan leh Higher Secondary Section ah Lalremruata, Govt JL HSS te an champion a. Elementary School Section ah Reiek Primary School-I, Middle School Section ah Modern Middle English School, Reiek, High School Section ah St Pauls HSS leh Higher Secondary Section ah Govt JL HSS te chu Team Champion te an ni a. Special prize- Best Participating School ah St Mary’s School, Electric Veng leh Youngest Participant ah Lalrammawia Hauhnar, kum 5-mi, JH Light Dream English School, Phunchawng te hnenah lawmpuina pek a ni. Tournament a tel School zawng zawng te hian Chess khelhna bungrua Mizoram Chess Association hnen atangin an dawng vek bawk a ni.
