3044/2022-2023
Aizawl the 14th December 2022 : Vawiin khan School Education Minister Pu Lalchhandama Ralte chuan Mizoram Middle School Teachers Association (MSTA) General Conference, Synod Conference Centre Aizawl-a neih chu khuallian niin a hmanpui

School Education Minister chuan MSTA General Conference-ah hian thusawiin zirtirtu chu hna zahawm anih avangin zahawmna kenkawh kawngah tan lak thar a tul a ni a ti a. Zirtirtute chu an tih atana mawi leh mawi lote ngaihtuah a, an tawngkam chhuakte leh incheinate thlenga inuluk lehzual turin a fuih a, Headmaster-te pawhin an thawhpui zirtirtu theuhte fuih fo turin a chah a ni.

Minister chuan zirtirtute chu school neitu thinlung put kawngah tan la thar turin a chah a, zirna in tlabal lutuk te a mawi lo tih sawiin sorkar kut nghak vek lova an tih theih ang ang ti a tuaihnum thin turin a chah a, hun vawn dik thu-ah tan la thar tur leh sorkar hnathawk an nih anga conduct rules zawm turin a chah bawk. Pu Lalchhandama Ralte chuan Mizoram zirna syllabus chu national standard vek a nih thu leh hemi mila zirtirtute an intuai thar a tul hle a ni a ti a. Sikulah naupang lut an tlem chuan thawktute mawh a nih avangin zirtirtute chu nu leh pain an rin ngam, naupangin an pan nih tum turin a fuih bawk a ni. Minister chuan zirtirtu rualte chu khawtlang leh kohhran te nen thawhhona tha nei tur te, mipuiin sorkar sikula rinna an nghah theih nana tan la tur leh enrolment tam zawk neia, mite bawm tlak rimtui chhuah thin turtein a sawm a ni.

Vawiin MSTA General Conference-ah hian Minister-in MSTA Silver Jubilee Souvenir a tlangzarh nghal a. Chawhnu lamah hruaitu thar an thlang a, an pawl hmalakna tur ngaihtuahin ro an rel nghal bawk. MSTA-ah hian member 2589 an awm a. General Conference hi Pu Rosangzuala Ralte President MSTA-in a kaihruai a, school aiawhte leh Sub-Headquarters hruaitute an kalkhawm a ni.

Attachment

  • Loading attachment...