1679/2023-2024

Aizawl the 28th August, 2023: School Education Minister Pu Lalchhandama Ralte chuan National Award to Teachers dawng tura Pu Lalthianghlima Teacher Govt Diakkawn H/S thlan a ni chu chhuanawm a tih thu a sawi a, zirtirtu thate hi ram tan an hlu tih sawiin zirlaite kawng sialtu pawimawh a nih zel theih nan duhsakna a hlan. Minister chuan National Award to Teachers hi tam zawkin an dawn theih nan zirtirtu tha leh chhuanawm tak tak ten tan la zel se a duh thu a sawi bawk.

National Award to Teachers 2023 dawng tur Ministry of Education-in tun hnai khan a puang a, he chawimawina dawng tur hian Pu Lalthianghlima Teacher Govt. Diakkawn High School chu thlan a ni.

National Award to Teachers 2023 dawng tur hian mi 50 thlan an ni a, Award hian chawimawina thuziak bakah pawisa fai Rs 50,000/- leh silver medal a keng a ni. Award dawng tur hian September 3-6,2023 chhung N.Delhi-a Ashoka Hotel five star-ah thlentir an ni ang a, September 3-ah hian briefing neih a ni ang a, September 5,2023-ah Vigyan Bhawan New Delhi-ah hlan a ni ang.

Kum 2018 atang khan National Award to Teachers dawng tur thlan dan hi tihdanglam a ni a, state sorkarin dawng tlak nia a hriatte a rawt mai bakah anmahni ngeiin endiktute hmaah school-a an hnathawh dan leh thiltih dan te presentation hmanga an sawifiah a ngai a, endiktuten zawh duh an neih apiang an zawt thin bawk.

Award thlan dan tihdanghlam hnuah hian Mizoram atangin zirtirtu 4- he chawimawina dawng tur hian thlan an ni tawh a. Award dawngtute chu - Kum 2018 khan Pu G.S.Zaithantluanga Headmaster Govt. Diakkawn H/S, Kolasib; Kum 2019-ah Pu Jayanta Nath Maji Govt Keifang H/S; kum 2021-ah Pi Jacinta Vanlalengzami A&M Grandchild School N.Vanlaiphai; Kum 2023-ah Pu Lalthianghlima Govt Diakkawn H/S Kolasib te an ni. Govt Diakkawn High School atang hian National Award dawng hi zirtirtu pahnih an awm ta a ni.