Vawiin khan School Education Department bultumin Government Elementary School Headmaster-te tana intuaitharna hun ‘One Day Refresher Programme for Elementary School Headmasters’ , Dawrpui Multipurpose Centre, Aizawl-ah neih a ni a, School Education Minister Pu Lalchhandama Ralte-in a hmanpui.

Khuallian chuan Federation of Mizoram Government School Teachers(FMGST) hmalaknaa Elementary School Headmaster te puala hetiang hun buatsaih a ni chu lawmawm a tih thu a sawi a, Education Department-a thawktute hi Mizoram sorkar hnuaia thawktu zawng zawng zaa 30% vel an ni a, chutiang taka thawktu tam tak enkawltu ni theia mipuiten an duhsaknaah lawmthu sawiin Education Department hnuaia thawktu zingah kohhran leh khawtlanga a khaipa thahnem tak an awm chu lawmawm a tih thu leh Education Department neplohzia tilangtu a ni, a ti. Zirtirtu hna hi hna zahawm a ni a, Headmaster te ngat phei chuan zah an hlawh lehzual a, hei vang hian zirtirtute hi sorkar hna thawk dangte nena bukna khata khai rual theih an nih loh avangin a tha zawngin an danglam ngam tur a ni, a ti. Tun sorkar tharah hian Zirna(Education) chu ngaih pawimawh berte zinga mi a ni dawn a, zirtirtu a nghet ni chiah lote hlawh bat lailawk thin pawh a theih chin chinah pek zel a ni a, Mizoram puma sorkar School-a zirtirtu indaihlohna tiziaawm tura zirtirtu 946 lak tur chungchang pawh thlir dan hrang hrang awm mahse, Elementary bikah zirna siam tha tura zirtirtu school tina 4 tal awmtir chu an thupui leh an tum ber a nih thu a sawi.  Headmaster tam tak zingah thenkhat chu School-in a mamawh avanga mahni hlawha zirtirtu rawih belh an awm thin chu lawmawm a tih thu leh chutihruala mawhphurhna dang zirna in leh a compound-te sorkar aiawha mahni ta anga humhalh a tul thu a sawi a, sorkar thara kalphung thar hrang hrang - School kai hun her danglam te, CCE kalphung her danglamte pawh lo thlawpa theihpatawp lo chhuah turin Headmaster-te chu a sawm bawk. Sorkar School hrang hranga Enrolment tlahniam leh sorkar school sawi khawm leh khar ngai hiala awm thin chu Headmaster-ten "keimah vang a ni" tia a mawhphurhna la ngam a, insiamthaa Enrolment Drive lamah pawh pianthar a tul thu leh kum 2020-ah phei chuan School khar ngai khawpa Enrolment nei chhia zirtirtute chu boruak dang hip tir sorkarin a hnial dawn lo tih a sawi. Sorkar nena tangrualin khawtlang leh tualzal nundan tha zonunmawi bo chho mek chawi nung thar leh tura School lamah bul tan thar lehin Mizo ram leh hnam siamthat nan zirtirtu zahawmna chawi nung thar leh turin kan puanven i sawi chhing ang u, tiin Headmaster rual kalkhawmte chu a sawm a ni.

Khualzahawm Pi Esther Lalruatkimi, IRS, Commissioner & Secretary, School Education pawhin thu sawiin Headmaster te mawhphurhna hrang hrang a tarlang a ni.

Pi Lalzarmawii, IAS, Director of School Education kaihhruai vawiin Programme-ah hian Pu Rosangzuala Ralte, President, FMGST-in Exam kalphung thar a sawifiah a, district hrang hrang - Aizawl, Champhai, Kolasib, Serchhip leh Mamit atangin Government Elementary Headmaster thahnem tak an tel a ni.