Vawiin chawhma khan Rosebud School chuan an kum 25 din champha lawmna hun Ramhlun Venglaiah an hmang a. He hunah hian School Education Minister, Pu H. Rohluna chu Khuallian a ni.

Khuallian chuan Rosebud School in Silver Jubilee lawm thei dinhmuna an ding chu lawmawm a tih thu a sawi a. Zirtirtu hna hi hna zahawm a ni a, anni tel lovin ram leh hnam tan hmasawn a har a ni, a ti a. He school atang hian mi hlawhtling leh puitling tak tak an chhuak tawh a ni tiin zirlaite hnenah chuan zir chhuak tawhte anga hlawhtling ngei tura tan la turin a fuih a. Mizote chu missionary ten school min din sak atang khan hma kan sawn nasa hle a, tun dinhmunah hian zirna chungchangah siamthat ngai leh hmalakna tur a la awm a, hemi atan hian zirtirtu leh zirlaite an pawimawh hle a ni, a ti a. Zirtirtute tan training pawimawhna tarlangin sawrkar school leh private school-a thawk zawng zawng te pawh training an nei vek tur a ni a, chumi atan chuan National Institute of Open Schooling (NIOS) hnuaiah training nei turin registration tih tir an ni tawh a ni, a ti a. Zirlaite hnenah chuan mahni in vawng fai tura chahin faina kawnga hmasawn tur chuan mahni theuh kan pawimawh a ni, a ti a. School hrang hrang dinhmun enfiah (monitor) chungchangah tun aia chak leh felfai zawka kalpui tura ruahmanna siam mek a nih thu a sawi a. Private insititution  te pawh mumal zawka department atanga enkawlna turin hmalak mek a nih thu a sawi a. Zirlaite hnenah chuan hun tha kan neih te kan hman tangkai a ngai a ni tiin nu leh pa leh zirtirtu thu awih a, taima taka lehkha zir turin a fuih a. Rosebud School chu an kal zelna turah duhsakna a hlan bawk a ni.

Rosebud School hi kum 1992-a din niin tun dinhmunah hian zirtirtu 30 leh zirlai 870 an awm mek a. School-ah hian Nursery atanga Class X theng zirna a awm a. Kum 2010 atang khan kum tin National Children’s Science Congress-ah an zirlaite an tel ziah a. Kum 2016-2017 HSLC pass percentage chu 100% a ni bawk a ni.

Minister chuan Silver Jubilee puala siam Monument hawnna hun neiin Jubilee Souvenir a tlangzarh nghal a. Principal Pi Lalbiakzami chuan thusawina hun a nei a. Silver Jubilee Celebration Committee Secretary Ricky Lalventluanga atangin report ngaihthlak a ni a. Item hrang hrang – Choir, Live Band, Worship Dance, Solo leh a dangte en leh ngaihthlak a ni. Minister hian Rosebud School hnenah lawmpuina atan Computer Set 1 a hlan a. School Education Addl. Director, Pu K. Laldingliana chuan Minister hi a tawiawm a ni.