1695/2023-2024

30.08.2023: Vawiin khan School Education Minister Pu Lalchhandama Ralte chuan Pathian pa lo kawn Upper Sakawrdai khaw thar tan Comprehensive school building sak thar a hawng.

Minister chuan he school hawnnaah hian thusawiin Pathian pa lo kawn Upper Sakawrdaiah hmasawnna thar Comprehensive School hawn theih a ni ta chu lawmawm a tih thu a sawi. Minister chuan mamawhtute mamawh phuhrukna hmuh tur a awm hi a hlimawm hle a, a building ropui leh ropui loh lam ni lovin a hmun tur zawng chawpa khawtlang mamawh lian tak phuhruk a ni hi a ropui a, naupangte zirna sikul hawn thar a nih tak avangin he lai hmuna chhungkaw chengte pawh an pun zel a beiseiawm a ni a ti. Minister chuan he khua kal zel tur atan hian mel lung pawimawh tak a tling a ni a ti. Upper Sakawrdai khawchunga la awm te insawn nan Pathianpa lo kawnah ram lei fel a nih thu leh a awm hmasa apiangte sakna tur a nih thu a sawi.

Minister chuan Zirtirtute chu hmathlir neia kal turin a fuih a, khawtlang pawhin an chenna tur lo ngaihtuahpui a tul thu a sawi a, Anganwadi sakna tur pawh ruahman nghal a tul thu a sawi. He zirna hi khawtlang leh Zoram tana mi chhuanawm chher chhuahna ni se, tlangdung barakhaih thei tur naupang chher chhuahna nise a duh thu a sawi bawk.

Pu Lalchhandama Ralte chuan nimin leh tukina Sakawrdai CHC-a Free clinic buatsaihah Sakawrdai leh a chhehvel mipui mi sangkhat vel zet an inentir thu leh mahni thawhna tlansana Aizawl atanga Doctor rual inpete chunga a lawm thu a sawi a. Doctor ten an clinic a sum tam tak hmuh tur tlansana tlawmngaia Sakawrdai an pan thei chu ropui a tih thu a sawi bawk. Pu Lalchhandama Ralte chuan dam lote chu damdawi an mamawhte a thlawna pek tur tumsak an nih thu a sawi bawk.

Pathian pa lo kawn Upper Sakawrdai hi khaw hmun thar a ni a, Upper Sakawrdai khaw chunga mite insawn nana ruahman a ni. School hawn tharah hian class I-VIII an awm a, teacher 5 an awm.  School hawnnaah hian Minister hi Sinlung Hills Council Executive Member Pu C.Lalnuntlanga, Pu H.Lalengzauva  leh member thenkhatten an tawiawm a, khawtlang hruaitute leh zirtirtute an kalkhawm a ni.