2710/2024-2025
27th October, 2024 : School Education Minister Dr Vanlalthlana chuan October 27,2024 Zirlaite Ni pualin Inrinni khan thuchah a sawi a. Zirlaite pawimawhna leh hlutna sawiin kan ram hruaitu leh hna pawimawh chi hrang hranga a fawng chelhtu turte an ni a, ram changkang apiangin zirna tha nei turin tan an la thin a, mi puitling chher chhuah tam an tum thin a ni a ti.
Minister chuan hmun hrang hranga zirlaiten zirna tha an dawn theih nan sorkarin tan a la zel a, zirtirtu indaih lohna phuhruk nan Primary, Middle leh High School zirtirtu tur casual teacher thahnem tak lak an ni a, heng mite hi hmun kilkhawr zawka awm ten an tangkaipui hle a ni a ti.
Mizoram mai ni lovin ram hrang hrangah thalaite hnathawh tur nei lo hi buaipui tham a ni tih sawiin Minister chuan Mizoramah hian kumtin graduate thar 3000 chuang awm zel anga chhut theih a ni a, chutih laiin sorkara hnaruak awm chu kum khatah za tam a ni thei lova, kumtina zirlai chhuak tharte thawh tur hi sorkar emaw company emaw tan siam mai sen a ni lo tih sawiin zirlaiten mahni kalkawng tur thlira rilru nei taka zir turin a fuih.
Dr Vanlalthlana chuan zirlaite chu All India level-a hna exam-ah leh zirna sang zawk zawmna atana entrance exam-ah te tun aia lut tam thei tura inbuatsaih turin a fuih a. Zirlaite chu an zirlai tibuai thei ruihhlo laka inthiarfihlim tur leh HIV/AIDS laka him nan mipat hmeichhiatna kawnga inthiarfihlim turin a chah bawk. Ruihhlo ngai zinga a tam ber chuan kum 12 atanga kum 18 inkarah an ti tan a, High School leh Higher Secondary school an kal laiin nun an tikhaw lo hman a. Zoram tana inchher puitling ngei tura kan duh te kha chhawr hleih theih lohin tam tak an awm mek a, a pawi hle a ni a ti.
Minister chuan zirlaiten vawng reng se tih a duh chu Mizo hnam nuna mawi em em, kan pipute atanga kan chhawm chhoh zel, aia upate zahna a ni a ti a. Kan hnam nunah aia upate hlutna leh pawimawhna a sang hle tih sawiin aia upate zah nachang hre thar turin a chah a, puipunnaah leh social media-ah te pawh an bula sawi awm leh awm loh ngaihtuah thin turin a chah bawk.
Minister chuan zirlaite inzir chhuah hun hi chhungkuain a nghakhlel a, ram leh hnam pawhin hriatna leh thiamna thar neih belh duhin a thlir reng tih sawiin zirlaite chu Mizoram timawi a, zirna kawng hrang hranga invawrh sang a, Mizo nihna mawi tak par vultir a, kan ram leh hnam tana taimak chhuah thar theuh turin a sawm a ni.
