Vawiin khan Teikhang Re-Union  vawi 2-na Teikhang khaw kawna hman chu Bialtu MLA, Pu H. Rohluna, School Education Minister chuan a hmanpui.

Ni thum awh tur Teikhang Re-Union ni hnihna vawiina hmanah hian khuallian School Education Minister Pu H. Rohluna chuan Teikhang Re-union vawi 2-na chu Chief Minister-in hmanpui a tum  ngei thu leh rokhawlhna lian tak avanga a remchan tak loh thu  ah mipuite hriathhiamna a ngen a. Teikhang khawtlang leh sorkar thawhdunna a that avangin Teikhang khawtlang pawhin nasa taka  hma an sawn a,Assembly Speaker-in Sialkal tlangdung hmasawnna  atana a din, Sialkal Range Development Council(SRDC) kaltlangin hmasawnna hna tam tak thawh a ni tawh a ni a ti a.

Minister chuan Ngopa-Mimbung kawngpui siamtha turin PWD-in tender a chhuah tawh thu leh a thawktu tur pawh thlan fel thuai a nih tur thu  leh he  kawngpui siamna atan hian NABARD atangin cheng Vaibelchhe 18 hmuh a  nih thu sawiin  mipui te chu Teikhang khaw tihmingthatu ni tur leh zirlaite pawh chhawr tlak thiamna nei tura lehkha zir turin a fuih a. Teikhang Re-union lungphun leh Teikhang lalnu Lalvapi Sailo leh lalpa Kamzalian Hauzel te lim a hawng nghal a ni.

Ngopa  BDO Pi Lalhruaitluangi pawhin thu sawiin  mipuiten sorkar scheme hrang hrangte a nihna ang taka hmang tangkai tura fuihin faina leh zirna lamah theihpatawp chhuahturinkalkhawmte a chah a ni.

Teikhang Re-union  hi January 24,1987 khan hman a lo ni tawh a, tun tum hi a vawi hnihna niin Teikhang khuain kawng hrang hranga hma an sawn theih nan infuihtharna hun atan an hmang a, Re-union hian Bible chang tlawhchhan neiin Tah Hla 3:40 hi  thupui atan an hmang a ni. Teikhang Re-union-ah hian Teikhang khaw mipuite bakah Teikhang khaw chhuak  Mizoram chhung leh pawna awm thahnem tak an tel a ni.