No.1481/2021-2022

Aizawl the 20th July, 2021 : Vawiin khan InSPA, Mizoram leh Directorate of School Education tang dûn buatsaihin Mizoram chhunga Secondary School Teacher-te tân ni hnih awh tur 'International Online Workshop on Issues in School Psychology' sawihona neih tan a ni.

Dr. Lalzirmawia Chhangte, IAS, Secretary, School Education leh InSPA Patron ni bawk chuan he International Online Workshop hi a hawng a; COVID-19 hripui len lai leh nunphung pangngai a khaihlak laia hetiang programme ruahman a ni chu tha a tih thu a sawi a. Secretary chuan Psychology hi uar zawkin zir ila, zirtirtu leh zirlaite pawhin kan hlawkpui a rin thu a sawi bawk. Thalaite khawvelah psychology hi a pawimawh a, tun hun 'hun rangkachak' hripui len laia Online International workshop buatsaih a ni chu Psychology hriatna lamah pawh hmasawntirtu a nih ngei a beisei thu a sawi.

School Education Director Pu James Lalrinchhana pawhin workshop hawnnaah hian thu sawiin tunlai boruak nena inmil thupui pawimawh tak tak hmanga international online workshop neih a ni chu lawmawm a tih thu leh mithiam hrang hrang thupui sawite, he International Online Workshop-a tel zirtirtu zawng zawngin an hlawkpui ngei a beisei thu a sawi a, thinlung takin Organising Committee chungah lawmthu a sawi. Director chuan InSPA nen tangkawpa workshop neih hi a tum li-na a ni tih sawiin Education Department hnathawh that avangin Directorate of School Education chuan 'InSPA Educational Excellence Award, 2020' a dawng a, Dr. Rinpari Ralte, State Convener pawhin 'P.A. Sharma Best School Psychology Trainer Award, 2020 a dawn tawh thu a sawi. Pu James-a chuan he International Online Workshop atanga naupangte dinhmun hrechianga a taka hmang turin zirtirtute chu a fuih a ni.

Dr. Panch Ramalingam, President, InSPA & Asia Pacific School Psychology, Malaysia chuan thu sawiin he International Online Workshop hian Mizoram State-ah Quality Education a thlen ngei a beisei thu a sawi a. School Psychology lehkhabu Mizo tawngin neih a nih thuai dawn thu sawiin Prof. Rinpari Ralte-in a buaipui mek thu a sawi.

School Psychology lama mi thiam bik resource person rawn tel-te chu:
1) Dr. Panch Ramalingam, Puducherry University
2) Prof. Kamal Uddin, University of Dhaka
3) Prof. S.Thenmozhi, Madras Univerity
4) Prof. C. Lalfamkima Varte, Mizoram University
5) Associate Prof. Dr.Balan Krishnan, University of Malaysia
6) Dr. Parvathy Varma, Assumption University, Bangkok te an ni.

He Online International Workshop-ah hian District 11 atangin Zirtirtu 1057 zet an tel thei a, YouTube atangin mi engemaw zatin an lo thlir bawk, a hlawhtling hle. Online Workshop hi Secondary School level-a International Online Workshop neih vawi hnihna a ni a, zirtirtuten zirlaiteah an put darh leh tur thu tha tak tak, tangkai tak leh hman nghal tur thil zirho a ni. Mizoram chhunga District 11 atanga Secondary School hrang hrang atangin Zirtirtu pahnih - mipa pakhat leh hmeichhia pakhat zel tel tura tih an nih angin an tel tha hle.

Mizoram chhunga Secondary School Teachers puala buatsaih 'International Online Workshop on Issues in School Psychology' hi naktuk July 21 hian a tawp ang.