Vawiin khan tun hnaia Scrub Typhus avanga nunna chan awmna hmun enfiah tura thawk chhuak Integrated Diseases Surveillance Programme te chuan zan khat chama Thenzawlah hun an hman hnu-in Aizawl an lo kir leh a ni. 

Surveillance Team te hi Dr. Pachuau Lalmalsawma, State Nodal Officer IDSP, Lalfakzuala Pautu, State Entomologist leh Lalchhanchhuaha (Amtea Hauhnar) Projectionist te niin anni hian Thenzawla Scrub Typhus vanga nunna chan a nih dan chipchiar takin an va zir chiang a. Chhiat tawk chhungkaw chenna inah kal chilhin thil thlen dante uluk taka chhui chian a ni a. In leh a vel te pawh ngunthluk taka dapchhuah a ni a, ngun taka thil awmzia an zirchian hnu-ah report pawh an peih fel nghal bawk a ni. 

Ni 23th  May 2018 zan khan Joint YMA Hall-ah khawtlang hruaitute ko khawmin Scrub Typhus chungchanga inzirtirna hun (Awareness Campaign) an hmang ho va. He hunah hian Dr. Pachuau Lalmalsawma leh Lalfakzuala State Entomologist ten zirtirna an pek bakah khawtlang hruaitute nen zawhna leh chhanna hun hmangin inkawmkhawmna hun hlawhtling taka neih a ni. Khawtlang hruaitute pawhin hlawkthlak an tiin, hemi kawnga khawtlang huapa zau zawka inzirtirna neih a nih theih nan hmalak ho thuai tha an tih thu an sawi bawk.

Team Leader Dr. Pachuau Lalmalsawma, State Nodal Officer IDSP chuan Scrub Typhus thlen thei Tuhrik kan tih te leh, a pu darhtu rannung, sazu leh thildangte hi kan kiangah an ngampat lohna turin mahni in leh lo kan vawnfai a pawimawh em em a ni, a ti a. Khawsik reng reng ngaihthah lova a chhan zawng chhuak tura mithiam pan ran vat hi a him ber a ni, a ti bawk a. Faina leh thianghlimna ten he natna vei lo tura awmzia an neihdan a sawi bawk a ni. 

Surveillance Team-te hian vawiin khan meeting-ah report te an pe nghal a. Hemi rual hian department chhunga tunlai natna hrang hrangte chiang leh ziktluak taka inhrilhhriatna atana buatsaih, IDSP Bulletin chu Dr. Lalchungnunga, Director of Health Services chuan a tlangzarh nghal bawk a ni.