352/2022-2023
Aizawl 29.4.2022: Chief Minister hovin vawiin khan CM Cabinet Meeting room-ah SEDP Governing Board meeting neih a ni.

Vawiina Governing Board thukhawm chuan Executive Board in SEDP hnuaia 'family oriented' hmalakna hnuaia trade hrang hrang thlan theih leh a kalphung tur a rawn chhawpchhuahte chu thlirho in, siamthat ngai leh belh ngai te an sawiho. Family oriented SEDP chuan mahnia eizawnna (self-employment leh kuthnathawh) bultan nan leh heng eizawnna kalpui mekten hma an sawn zel nana an hman tur tanpuina pek a, Mizoram chhunga mimal leh chhungkua, a tam thei ang ber dinhmun tha zawka hlan kai chu a thil tum a ni.

Vawiin meeting-ah hian Deputy Chief Minister Pu Tawnluia, Home Minister Pu Lalchamliana, P&E Minister Pu R. Lalzirliana, State Planning Board Vice-chairman Pu H. Rammawi leh Planning & Programme Implementation Secretary Pu Lalmalsawma Pachuau te an tel a ni.