693/2022-2023
Aizawl 30th May, 2022 : Planning & Programme Implementation Department, Government of Mizoram leh State Institute of Rural Development & Panchayati Raj (SIRD & PR) te tangkawp hmalakna thar, thingtlang khua hmasawnna leh intodelhna tur ‘Village Level Development Programme’ Pilot Project chu Community Hall, Sekhum ah vawiin khan Mizoram Youth Commission Chairman, leh bialtu MLA ni bawk Dr Vanlaltanpuia chuan a hawng.

He hunah hian MYC, SIRD & PR, KVI, Horticulture Departments thawktute leh Sekhum khawtlang hruaitute leh beneficiary te an tel a ni.

Vawiin program, Pu Lalhmunsanga Hnamte, Director SIRD&PR kaihhruaiah MYC Chairman Dr Vanlaltanpuia chuan khawtlang hmasawnna tur leh mipuiten eizawnna ngelnghet an neih theihna tura hmalakna pawimawh tak Village Level Development Programme buatsaihtu Planning & Programme Implementation Department leh SIRD&PR te chungah lawmthu a sawi a. Hmasawnna daih rei leh mipuite tana chhenfakawm nei turin a bulthut atanga hmalakna kalpui kan uar chho zel a tul takzet a ni tiin beneficiary te chu an sum leh hmanrua dawn te anih tur ang taka hmang theuh turin a chah a. Sawrkar leh khawtlangin uluk taka zirna leh inrawntlanna an neih hnua ruahmanna fel tak siam tak chu beneficiary ten rinawm leh taima taka ti puitling ngei turin an chah a ni.

MYC Chairman hian khuai khawi tur beneficiary panga (5) leh balhla ching tur beneficiary (15) hnenah 1st installment a hlan nghal a. Khuai khawi tur leh balhla ching tura thlanchhuah te hian a zavaiin Rs.50,000/- man hu hmanrua te an dawng dawn a, khuai khawi tur te hian khuai bawm (box) sawm theuh enkawl thei tura ruahman niin balhla ching tur te hian kung 500 theuh enkawl thei tura ruahman a ni.

Pu Malsawmtluanga Fanai, Principal, Extension Training Centre, SIRD&PR Lunglei chuan VLDP kalphung tlangpui sawifiahna hun hmangin he Pilot Project hi Mizorama District 6 ah khaw pakhat theuh thlang chhuaka kalpui tur anih thu a sawi a.
Sialam khua, Aizawl District-ah handloom;
Sekhum khua, Lunglei District-ah khuai khawi leh balhla chin; Chawngtlai khua, Khawzawl District- ah handloom; Lungdai khua, Kolasib District-ah water reservoir;
Ailawng khua, Mamit District-ah tourism and livelihood; Leng khua, Serchhip-ah irrigation canal hmalakna (Entry Point Activity) te kalpui a ni dawn a. Heng khua ah te hian khawtlang dinhmun leh eizawnna kalpui dan tlangpui te uluk taka zirchian hmasak niin, khawtlang mipuite nen inrawn chungin Entry Point Activity te hi thlanchhuah a ni. VLDP hnuaia hmalaknate hi Sustainable Development Goals (SDG) thil tum hrang hrangte ti hlawhtling tura ruahman niin mipuite hnenah leilung leh ramngaw humhalh dan inzirtirna te pawh neih chhoh zel tum a ni.

Pu Lalchhantluanga, VCP, Sekhum chuan EPA leh Beneficiary thal dan a sawifiah a. Pu R. Rothuama, Village Development Committee (VDC) member chuan lawmthu sawina hun a hmang bawk.

Vawiin program ah hian Technical session pawh neih nghal niin Pu K. Lalremruata, Faculty, SIRD & PR, Pukpui chu Programme Moderator a ni a. Pi Liansangpuii Pachuau, District Horticulture Consultant, Lunglei District chuan ‘Balhla phun leh enkawl dan’ a zirtir a, Pu JH Lalbiakliana, Deputy CEO, KVI Lunglei in ‘Khuai khawi chungchanga hriattur pawimawh’ a zirtir bawk a ni.