Mizoram University, Department of Economics leh OKD Institute of Social Change & Development, Guwahati buatsaih, Seminar on Governance and Development chu I&PR conference hall-ah ni 5 chhung neih a nih hnuin vawiin khan khar a ni ta a. Higher & Technical Education Minister Pu Lalsawta chu Khuallian a ni.

Thu sawiin Pu Lalsawta chuan ram rorelna leh hmasawnna atana  a ngaihpawimawh deuh deuh te a tarlang a. Ram hnufual, ‘underdeveloped countries’ tia sawi te chu a nihna takah chuan ‘undermanaged countries’ an ni, tiin ram leilung hausakna enkawlna fel tak a awm loh vanga hnufual an ni, a ti a. Rorelna fel leh hmasawnna nei tur chuan Merit system a innghah a pawimawh, tiin Pu Sawta chuan khawvel ram hausa leh chak ber nia sawi United States of America meuh pawh kum zabi 20-na hnu lama an ram rorelna kalphungah Merit System an hman hnu ah chauh khawvel hriata ram chak leh ropui an ni thei, a ti a. Sumdawnna  lian tak tak khawihtu ten an mawhphurhna ah an hnuaia hnathawkte hma khua an thlir tel a pawimawh zia tarlangin Pu Sawta chuan Corporate Social Responsibility pawimawhna hi sorkar pawhin a hlamchhiah thiang lo a ni, a ti bawk.

Vawiin Seminar kharna chawhma hun hi Prof. A.K.Agarwal, Head, Economics Department -in a kaihruai a. Minister chuan lehkhabu 2,  “India - ASEAN Economic Integration Opportunities & Challenges for India’s North East”  leh “Proceedings of The National Seminar on Financial Inclusion : Issues & Challenges” te a tlangzarh  a. Prof. Vanlalchhawna’n heng lehkhabu 2 chhung thu tlangpui sawi hawnna a nei a. Chawhnu hun chu Prof.Lianzela leh Prof.Thangchungnunga ten kaihruaiin Pu Denghnuna, IAS (Rtd), Prof J.K.Patnaik, Deptt. of Political Science, Prof.S.Pathi, Deptt of Public Administration, Dr.Lalrintluanga, Asso.Professor & Head, Deptt of Public Administration,  Prof.Lalneihzovi, Deptt of Public Administration, leh Prof. Vanlalchhawna Deptt of Economics MZU te paper present ngaihthlak leh sawiho a ni.