Vawiin khan Zoram Research Foundation leh Mizoram sorkara Finance Department tangkawpin I&PR Conference Hall-ah ‘Seminar on Issues & Concern on Public Finance of Mizoram’ buatsaih a ni.

Pu Rin Sanga, IAS (Retd.), Sr. Vice Chairman, ZORF kaihhruai seminar-ah hian Finance Secretary Pu Lalmalsawma, IAS chuan Keynote Address sawiin Mizoram sum leh pai dinhmun zirchianna leh tihhmasawn dan tur sawihona hun buatsaih hi a hun takzet a, vawiina kalkhawm sorkar officials bakah mithiamten rawtna tha tak tak an siam te chu sorkar pawhin a hmang tangkai ngei ang, a ti. State-in leiba a nei te chu duhthusamin chinfel a la ni thei lova, 13th Finance Commission-in GSDP atanga teh a kan leibat zat tur target a siam 3% kan phak a rinawm rih vak lo tih a sawi a. Mizoram chu sum leh paiah state intodelh lo ber zing ami a ni a, thawhchhuah ve kan neih tlem em avagin Plan size pawh a thang hlei thei lo a ni tih a sawi bawk. Sum indaihloh ti zualkaitu lian ber 2 te chu mipuite hnenah buhfai a tlawm zawka hralh a nih theih nan sorkar a inseng nasat avang leh indaihzai zawka kawlphetha sem darh a nih theih nana sorkar sum senso leh sum lakluh inpha-man lo lutuk te a ni tih a tarlang. Chhiah lak (Tax Revenue)-ah phei chuan GSDP tehna atangin kan hniam fal hle a, sorkar tan sum hmuh belh dan tur dapchhuah a tul takzet tawh a ni tih a sawilang bawk. Mizoram thawhchhuah tipung tur chuan mipui pawhin mawhphurhna kan nei a, sorkara kan pek tur ang pek luh kawngah hian thahnemngaih zual a tul a; sorkar pawhin sum leh pai dinhmun siamthat nan sum a hmanna lam uluk zawka zirchian a, a theih chen chena titlem tura hmalak chu a tih ve tur a ni thung dawn a ni, a ti.

He Seminar ah hian Dr. R. Zonuntluanga, Associate Professor, Department  of Economics, Govt. Aizawl College ziak Paper ‘Issues & Concern on Public Finance of Mizoram’ tih chhiarchhuah a ni a.  He Paper behchhanin Plan Fund, Plan Revenue Expenditure, K-Deposit, Quality of Expenditure, Sum hmuh belhna lam, Aizawl Tui Supply, Sum hmanna tih tlem, Salary leh a kaihhnawih expenditure sang lutuk ti tlem tura hmalak dan tur te, subsidy tih tlem leh State leiba ti hniam tura hmalak dan tur chungchang te sawiho a ni. Mizoram sum leh pai dinhmun tun aia siam tha tur chuan mipuite lamah pawh chhiah tam zawk lak a tulzia pawh sawiho a ni.

Vawiin Seminar-ah hian Panel Member te chu – Pu Lalthansanga, Finance Secretary; Prof. Lianzela, Controller of Examination, MZU; Dr. K.Laldailova, Asst. Professor, Department  Of Economics, PUC leh Dr. Lalrinchhana, Sr. Research Officer, Mizoram State Planning Board an ni a. Pu Lalkhama, IAS (Rtd), Vice-Chairman, State Planning Board pawhin he seminar hi a hmanpui a, Political Party hrang hrang leh tlawmngai pawl hruaitute, chanchinbumi te leh mithiam sawm bik te an kal tha hle a ni.