Vawiin khan Serchhip-a AH & Vety Department chuan an Office tualzawlah Serchhip District chhung khaw hrang hranga Rashtriya Krishi Vikas Yojana (RKVY) Scheme hnuaia Vawk vulh tura thlan te hnenah Vawk note 94 an sem a, nimin khan Thenzawl-ah Vawk note 31 sem a ni bawk.

Mizoram in Vawk note tam zawk a tharchhuah theih nan Vawkte te hi sem a ni a, Serchhip District chhunga Vawkpui tur Vawk note dawngtute chi 4-ah hetiang hian then an ni :

Vawkpui tur Vawk note 1 dawng = chhungkaw 15

Vawkpui tur Vawk note 2 dawng = chhungkaw 35

Vawkpui tur Vawk note 5 dawng = chhungkaw 4

Vawkpui tur Vawk note 10 dawng= chhungkaw 10 No.

3 & 4 a chhungkaw 14 te hian Vawkpui tur Vawk note bakah Vawk In sakna tur leh a chaw man bakah thil tul dang danga an hman tur cheng nuai 2.5 an dawng tel a, heng bakah hian Chhiahtlang leh Keitum-a chhungkaw pakhat ve ve te chu Vawkpui 10 vulh tura thlan niin an hnenah hian Vawk note 10 ve ve pek an nih bakah Vawk In sakna tur leh Vawk chaw man bakah Vawk vulhna mamawh atana an hman turin cheng nuai 5 ve ve pek an ni bawk a ni.

District AH & Vety Officer, Dr. Vanlalenga chuan Mizoram-a Vawk natna hri, PRRS avangin Vawk a pun chakloh thu leh Vawk tipung turin liantham leh nasa zawka hma lak a tul tih chu sorkar ngaihdan a nih thu sawiin, hemi tih hlawhtlinna atan hian RKVY atangin heng Vawkte te hi sem a nih thu a sawi a. Vawkpui vulh tur hian Vawk vulh awm mi leh vawk lo vulh tawh te an thlan thu leh heng mite an inhuam dan a zirin Vawk note an pek zat pawh hi a in anglo tih a sawi a. Vawk note te hi PIGFED kaltlangin phai lam ami chah a nih thu leh, tluang taka an vulh a nih chuan thla 7-9 ah Vawk te hi no pai thei tura beisei an nih thu leh heng vawk note dawngtute hi vil zuiin thla thum danah report pe tura tih an nih thu a sawi a, heng Vawk dawngtute hi an Vawk in vawi hnih (2) tal no a neih hma chuan tihral phal a ni dawnlo bawk a ni. Serchhip District-ah hian kumin July thla thleng khan vawk 1410 te thisen chu endik ni tawhin heng zinga Vawk 154 te chu PRRS hri vei an ni ngei tih hmuhchhuah a ni tawh bawk a ni.

Serchhip-a AH & Vety Department hian kumin kumtir lam han chhungkaw 101 te hnenah Vawk note hi an lo sem tawh bawk a ni.

Attachment

  • Loading attachment...