Vawiin chawhnu dar 2:00 khan Serchhip District Bawrhsap Dr. Lalrozama hovin a pisa ah Serchhip District a Census town / urban area 3 (Serchhip, Thenzawl, North Vanlaiphai) a Cable TV Operators ten Cable TV Digitization chungchanga an dinhmun leh harsatna tawh te an sawiho a, Cable TV Digitization chungchanga District Nodal Officer Pu VL Remliana, MCS, Addl DC leh Pu Andrew H Lalremruata, MIS, DIPRO te pawh he sawihona ah hian an tel.

Bawrhsap chuan cable TV digitization chungchangah Sawrkar Laipui a hmanhmawh em em tawh a, Mizoram Sawrkar pawh a nawr deuh reng a ni a ti a, kan dinhmun diktak hriat an duh avangin leh kan harsatna tawh te hriat an duh avangin an rawn nawr na tawh hle a ni a ti a, chak lehzuala hma kan sawn phah theihna tur kawng a awm beiseina avangin harsatnate, rawtna kan neih te sawiho a tul hle tawh a heng harsatna te leh rawtna te hi thuneitu sang zawka a rang thei ang bera thlen anih dawn thu a sawi bawk.

Vawiin thutkhawmah hian Set-Top Box indaihlohna avanga harsatna an tawh thin chu a awm tawh loh thu Cable TV operator te hian an sawi a, an harsatna tawh chu mipuiten Set-Top Box lei an hmanhmawhloh vang ni a an hriat thu sawiin hei hi Set-Top Box man a to deuh vang leh Analog Signal tihtawp hun tura Sawrkarin a siam hnu a tihtawp anih leh tak siloh vanga mipui an mutthluk zui vang ni bawk a an hriat thu an sawi a, Set-Top Box hi mipuite hnena pek dan chi thum - a man pek tlak nghal, rental leh hire-purchase system te a awm na in Cable TV operator te tan chuan a man pek tlak tir nghal zel anih loh chuan tlin ngaihna a awm bawk siloh thu sawichhuah a ni.

Analog signal la pekchhuah reng anih avangin mipuite an la ngaihtha rih a hei vang hian Set-Top Box lei an ngaihthah ni a a lan thu sawi a ni a, hemi chungchangah hian Bawrhsap chuan Sawrkar Laipui hun tiam a ral na a rei tawh avangin engtiklai pawh a analog signal hi tawp thut thei ani tawh tih mipuiten an hriatchian a ngai hle a a hriatthu sawiin hemi chungchang a hma lak dan tur pawh ngaihtuah a tum thu a sawi a, Multiple System Operator ten channel subscription rate an la siam fel theih loh avangin Local Cable Operator (LCO) te an la hawihai hle tih sawilan a ni bawk.

Cable Operator te dinhmun diktak hriatchian anih theih nan an customer neih zat bakah analog subscriber an neih zat leh Set-Top Box an semchhuah tawh zat thawhtanni (May ni 2, 2016) a Serchhip District Information & Public Relations Officer hnenah hriattir theuh tura rel a ni bawk. Serchhip District urban area-ah hian Cable TV Operator 7 an awm a, an zinga 5 te chu Multiple System Operator (MSO) LPS Vision hnuaiah Local Cable Operator angin an awm a, Thenzawl Cable Network (TCN) erawh chuan All India HITS Provider, NXT Digital hnuaiah Digital Headend a bun fel vek tawh a, ZONET thlunzawm telin a subscriber te pek tur Set-Top Box pawh nei kim tawhin May ni 1, 2016 atang Set-Top Box a ti nung ang a, reilote chhungin subscriber te a tuam chhuah vek tur thu ziak in Bawrhsap hnenah a report a, North Vanlaiphai a Net Home Cable pawhin hetiang bawk a hma lak a tum thu leh Service Provider a la thlan fel loh thu a sawi bawk.

Serchhip District urban area a Multiple System Operator (MSO) LPS Vision hnuaia Local Cable Operator te chu TT Vision (Serchhip), SCN (Serchhip), KL Vision (Serchhip), TS Vision (Thenzawl) leh KT Vision (North Vanlaiphai) te an ni a, anni hian an MSO, LPS Vision, Aizawl in hma a lak chak leh chak loh ah an innghah thui hle thu an sawi a ni.

Sawrkar Laipuia Information & Broadcasting Ministry chuan Telecom Regulatory Authority of India (TRAI) rawtna pawmin India rama cable TV zawng zawng chu kum 2013 – 2015 chhungin Analog signal atanga Digital Addressable Sysytem (DAS)-a thlak vek turin hma a la a. Phase 1-ah metropolitan cities Delhi, Kolkata, Mumbai leh Chennai ah te hma a la a, Phase 2-ah mihring maktaduai khat chin chunglam awmna khawpuiah te hma a la leh a, urban area dang zawng te (Mizoram pawh telin) Phase-3 ah kan awm a,a tira ruahmanna ah phei chuan Phase-3 hi December ni 31, 2014 zawhfel tur a ni a, hei hi kum khat dang pawt seiin December 31, 2015 thleng hun hawn leh a ni a, he hun pawh hi a ral leh tawh avangin engtiklai pawha analog signal hi tawp thei reng tawh a ni a, Cable TV operator te leh subscriber te pawhin kan zavaia that tlanna tur ani tih hria a a hnu a talbuai lo tura inhmakhawsuih nachang kan hriat a pawimawh tawh hle a ni. Phase-4 ah hian India rama thingtlang khua zawng zawng tuam chhuah vek tur niin December ni 31, 2016 ral hma a zawhfel vek tur a ni.