BPL chhungkua chawikanna atana Sub Hqrs YMA Serchhip buatsaih Cement Mistiri Training ni 6 awh chu vawiin, Inrinni khan zawhfel a ni

He Training UD&PA SJSRY Scheme atanga YMA Sub Hqrs Serchhip hnuaia Training & Youth Affairs Committee te buatsaiha DIPR Conference Hall Serchhipa tun thla ni 9, thawhtanni atanga neih hi vawiin khan Pu ST Lalhmingmawia, District Project Officer SJSRY UD&PA-in khuallian niin a khar a, Serchhip Town chhung Chhiahtlang, New Serchhip leh Serchhip bakah Hriangtlang atanga training tha taka zo mi 19 te hnenah Cement mistiri bungrua, certifiacte leh DA a sem nghal. Khuallian Pu Mahminga chuan kharna thu sawiin- Serchhip District chu Mizoram District zingah vai mistiri te ruai lova mizo mistiri chauh rawihna District ni hmasa bera siam tum turin trained chhuak te a fuih a. Mizo ten hnam  dang hnena sum tam tak kan pekna leh hna kan siamsak tamna ber Cement work chu kan thiam ve a, kan ti thei ve a ni tih hriaa he lamah hian kan harh thar a hun takmeuh a ni tiin, hnathawktu tha leh chhawr tlak ni tur chuan rinawmna a pawimawh a ni a ti bawk.

Kharna inkhawm YMA Sub Hqrs Serchhip Treasurer Pu Kawlthuama kaihhruaiah hian training chhuak ta te aiawh te pawhin thu sawiin, mistiri training chu thil zawngchhangthlak tak a ni an ti a, Training buatsaihnaa mawhphurtute aiawhin Pu Lalrammawia  Training & Youth Affairs Committee  Chairman pawhin thu sawiin, Cement work chu hna dang a pun loh hnu pawha pung zel tur a nih avangin he hnaah hian innghat zui zel thei tura inzir zui turin trainees te a chah. Kharna inkhawm vawiina neih hi Pu V.Tlangthuama Sub Hqrs YMA Fin.Secretary in lawmthu sawiin a tin a ni. BPL chhungkaw aiawh Town chhung leh Hriangtlang Branch YMA atanga pakhat theuh training nei tura thlan chhuah te hian tunkar Thawhtanni atang khan training hi ngawrh taka neiin, Serchhip Dinthar Veng a mi Pu C.Vanlalzapa'n Instructor niin zirtirna a pek thin bakah , SDO (PWD) te pahnih, Er. ZD Laltlanzova, Er.PC Zokhuma leh Er.David Zodingliana, Asst Engineer DRDA, Serchhip te pawh in zirtirna pe in, Serchhip Hmar Venga Sport Complex sak mek te a hmuna kalin an zir chilh a, DLAO chenna in sak mekah an thil zir te a taka thawkin practical work an nei bawk a. Training ah hian atir ah mi 21 telin a tawp thlenga tel chu mi 19 an ni.

Attachment

  • Loading attachment...