Vawiin chawhhnu dar 01:00 khan District Bawrhsap leh District Level Committee of Teachers’ Day Chairman ni bawk Pi Juhi Mukherjee IAS hovin DC Committee Room-ah kumin 2014-a Teachers’ Day hman dan tur an rel. He hunah hian sawrkarin he committee-a a ruat member te an kal tha thawkhat viau a, kumina Teachers’ Day lo awm tur chu Serchhip bazar-ah district huapin zingkar-ah hman a ni ang a, chhun lamah sikul hrang hrang ten anmahni school theuhah an remchan dan angin an hmang chhunzawm ve thung dawn a ni. Hetih rual hian district chhunga Sub Division pahnih, North Vanlaiphai leh Thenzawlah te pawh SDO(C) te huaihawtin hman a ni bawk ang.

Teachers’ Day puala District Bawrhsap thuchah chu district chhunga cable TV operator leh sub operator zawng zawng ten September ni 4 zana an chhuah vek turin District Information & Public Relations Officer-in an semchhuak ang. Teacher’s Day pual hian school naupangte tan Slogan Writing competition buatsaih a ni bawk ang a, a titha ber thuziak chu hemi nia District Slogan atan hman a ni ang a, hmun ulau laiah kumhlun deuh taka tar chhunzawm tur a ni dawn bawk a ni.

Teachers’ Day lawman chi khat atan khawpui chhung hmun 2 leh a lawmna hmunah te DEO leh SDEO te bul tumin banner lian tar a ni ang. Kuminah hian kum danga kan tih ziah thin, zirtirtu vanduaina tawk leh chhawmdawl ngaite tana sum tuakna, pen, token, car flag leh thil dang an zawrh thin te chu hemi atana sum tling khawm a la thathnem deuh rih avangin sawrkar thutluknain tih rih loh a ni.