3700/2024-2025

Dated Serchhip, the 7^th January, 2025: Vawiin khan Serchhip-ah District TB Forum chu thukhawmin he thutkhawm hi an Chairman Pu Paul L. Khuma, DC Serchhip chuan a kaihruai a ni.

Serchhip DC Meeting Hall-a District TB Forum thutkhawm ah hian Bawrhsap Paul L. Khuma chuan TB natna chuan kan taksa-ah a tha lo zawnga nghawng chi hrang hrang a neih theih avangin kan ngaih pawimawh a tul thu a sawi a, kan lo vei palh a nih pawhin tha taka damdawi ei chu a enkawlna awmchhun a nih avangin TB vei te pawhin TB damdawi ei an ngaih pawimawh a tul thu a sawi a. He natna vei te enkawlna kawnga thawktute inpekna pawh fakawm a tih thu sawiin, theihtawp chhuah zel turin a chah bawk. 

He thutkhawm ah hian District TB Forum-a Co-Chairman Dr. LP. Malsawma, Sr. CMO Serchhip District pawhin thu sawiin, Member Secretary Dr. Lallawmkimi Chhakchhuak, District TB Officer chuan December 9, 2024 atanga '100 Days TB Campaign' an kalpui chungchang tarlangin, he hmalakna hi Mizoram-a District 4-ah kalpui mek a nih thu leh kumin-a World TB Day, March 24 thlengin kalpui a nih dawn thu a sawi a. Mi tlawmngai te tanpuina atanga TB vei damlo ten chawtha an dawn theihna tur, 'Nikshay Mitra' hnuaiah Serchhip District chhungah mi pahnih in tanpuina an dawn mek thu a sawiin; DC Pu Paul L. Khuma leh Project Director, DRDO Pu Malsawmtluanga Fanchun te pawhin hemi pual hian tanpuina an pek tur thu an sawi nghal bawk. 'TB Free Village' kalpui mekah kum 2023-ah Serchhip District-a khua 11 leh kum 2024-ah khua 35 te TB Free Village-ah puan an nih tawh thu tarlan a ni a, kumin a World TB Day-ah khua zawng zawngte TB Free Village a puan hman beisei a nih thu pawh he hunah hian tarlan a ni bawk. 

He huna tarlan anih danin kum 2024 khan Serchhip District-ah TB vei mi 69 hmuhchhuah niin December thla thleng khan mi 37 te chu enkawl dam an ni tawh a, TB damdawi ei lai mi 32 awmin MDR TB vei mi pahnih an awm mek bawk a ni.