Vawiin chawhma dar 11:30 hian Serchhip Bazarah Faina beihpui thlakna atan zirlai naupang ten kawng an zawh.

He hunah hian Pu Lalfakawma Chhakchhuak, Sanitation Officer, UD&PA Serchhip chuan thu sawiin, faina beihpui thlakna ah hian zirlai naupangte an pawimawh hle a, ram fai leh thianghlim kan neih theih nan naupang atanga bul tan a tul thin a ni, a ti. Kawngzawh tura kalkhawm naupangte chu faina pawimawh zia tlangau puitu leh mi dangte tihhmuhtu nih tum tlat turin a fuih bawk.

District Level Cleanliness Committee in ruahmanna a lo siam tawh angin he kawng zawh hi neih a ni a, school hrang hrang panga atangin zirlai naupang sawmthum theuh thlan chhuah ten faina inzirtirna thuziak kengin, faina au hla nen nen Serchhip Tuikhuah veng atanga AOC veng thlengin kawng hi an zawh a ni. Hei bakah hian District Level Cleanliness Committee hian school tinte chu faina pawimawh zia inzirtirna hun kumin Faina Hapta chhunga lo nei theuh turin a ngen bawk  ani.

Hun bula tanna hi Pu PC Vanlalluna, Deputy DPC, SSA Mission Serchhip chuan a kaihruai a, zirlai naupang Faina kawng zawh tura lo kalte leh an zirtirtute chungah lawmthu sawiin, vawiina kawng zawh hian zirlai naupangte thinlungah rah tha a chhuah ngei a beisei thu a sawi a ni.