4086/2023-2024

Dated Serchhip, the 8th March, 2024: Vawiin khan Serchhip P&E Veng YMA Hall-ah District Hub for Empowerment of Women (DHEW) leh District Legal Services Authority te tangkawp buatsaihin International Women’s Day hman a ni.

Pu Lalvensanga, District Mission Coordinator, DHEW chuan kalkhawmte chibai bukin, he ni hi hmeichhia te tana ni pawimawh leh chhinchhiahtlak a nih thu a sawi a. Hmeichhe dinhmun chawisan a la tulzia leh chumi kawnga Nu te pawimawhzia a sawi bawk a ni.

Pi Josangzeli Tlau, Judicial Magistrate First Class pawhin Dan lama mipui te hriattur pawimawh sawiin Legal Awareness hun a hmanpui a. Kalkhawmte hnenah Dan kaihhnawih thil hrang hrang zirtirin, hmeichhia te humhimna Dan -‘Protection of Women from Domestic Violence Act (PWDVA)2005’ chungchang zirtirna hun a nei bawk a ni.

He hunah hian Pi VL Remruatpuii, Gender Specialist, DHEW chuan kalkhawmte hnenah Beti Bachao Beti Padhao (BBBP) chungchang a thara inhrilhhriat lehna hun a hmang a. Serchhip Sub Headquarters MHIP President Pi Lianthangi pawhin thu a sawi a ni.

Poshan Abhiyan District Coordinator Pu James Lalremliana kaihhruai he programme-ah hian Serchhip khawpui chhunga MHIP Branch hrang hrang hruaitute an tel a. Pi V. Lalruatsangi , Specialist in Financial Literacy, DHEW chuan lawmthu sawiin hun hnung a khar a ni.