Vawiin nileng khan National Disaster Management Authority, Mizoram State Disaster Management Authority leh Serchhip District Disaster Management Authority te tawngkawp buatsaihin Serchhip DC Conference Hall-ah State-Level Table Top Exercise-cum-Capacity Development Programme on Disaster Response buatsaih a ni a, Maj. Gen.(Retd.) V.K.Datta, Senior Consultant, NDMA leh Pu Sangdingliana, Addl. Secretary, Disaster Management & Rehabilitation Department ten an hmanpui a ni.

Vawiina he Training Exercise hawng tu Pu Sangdingliana, DM&R Addl. Secy chuan Mizoram State Disaster Response Force din anih tawh thu leh Mizoram Police leh IR Batallion hrang hrang atangin mi 424 hnenah National Disaster Response Force kaltlanga Training pek an nih tawh thu te, tunah hian mi 376 hnenah training pek leh thuai tura ruahmanna siam anih thu a sawi a, Mizoram rawn vil tur leh Mizoram pual liau liau tur National Disaster Response Force Company 1 pawh reilote ah Mizorama dah an nih dawn thu a sawi bawk a ni.

Maj. Gen.(Retd.) V.K.Datta, Senior Consultant, NDMA pawhin powerpoint presentation hmangin Chhiatrupna emaw, buaina lian tham engemaw a awm palh a Incident Response System kaltlanga hmachhawn dan tur te, ruahmanna siam dan tur te, Department hrang hrang hmalakna tur kalphung te leh thil pawimawh dang tam a tarlang a, March ni 10-15, 2014 ah India hmarchhak pum huap Mega-mock Exercise neih tur thu te a sawilang bawk.

Serchhip District Bawrhsap Pi Juhi Mukherjee, IAS pawhin powerpoint hmangin Serchhip District Disaster Management Plan a tarlang a, a sawi zawh hian District dang atanga District Bawrhsap aiawh a kal ten anmahni District Disaster Management Plan theuh nen khaikhinna hun an hmang bawk.

Bawrhsap thusawi zawh hian Pu Romil Baaniya, IPS, Superintendent of  Police, Serchhip District in powerpoint hmangin Chhiatrupna lo thlen palh a Mizoram Police te inbuatsaih dan Disaster Response Plan a sawifiah a, District danga SP aiawh a kal ten an ruahmanna an sawi bawk a ni.

Heng bakah mithiam thlanbikte hnen atangin hetiang hian zirtirna ngaihthlak a ni :

1.         “Medical Response Plan of Serchhip during Disaster” : Dr. Z.D. Lalmuanawma, District Medical Superintendent

2.         “Role of Electricity Department during Disaster” : Er. J.H.Malsawma, E.E., P&E, Serchhip

3.         “Disaster Management Plan of  Fire & Emergency Services” : Lalbiaksanga, Station Officer, F&ES, Serchhip District

4.         “Role of NGOs in Earthquake Disaster” : R.L.Chhuanawma, President, YMA Sub-Headquarters, Serchhip

Naktuk February ni 5, 2014 (Nilaini) hian chhiatrupna a lo thlena chetlak dan lemchan (Mock Drill) Serchhip khawpui chhunga hmun thlan bik ah te neih a ni dawn a, Mock Drill hi a tak ang thei ang berah buatsaih anih vangin mipuite lo chiai lo tur leh chhanchhuaktu pawl leh Mock Drill a tel zawng zawngte tana harsatna siam lo turin District Bawrhsap chuan mipuite a ngen a ni.

Table Top Exercise neih zawh hian Maj. Gen.(Retd.) V.K.Datta, Senior Consultant, NDMA hovin mipawimawh ten Mock Drill neihna tur a hmun ruahman te an endik a ni.

Vawiin Table Top Exercise-cum-Capacity Building Programme hi Pu Lawmkima, MCS, SDO(Sadar) Serchhip in a kaihruai a, Lunglei, Lawngtlai leh Saiha District atangin Bawrhsap leh Superintendent aiawhte an tel a, Serchhip-a Sawrkar pisa hrang hrang aiawhte bakah, Tlawmngai pawl hrang hrang aiawhte leh Village Council hrang hrang aiawhte an tel tha hle a ni.