Vawiin khan Mizoram Tourism Development Authority (MTDA) chu an Chairman Tourism Minister Pu John Rotluangliana hovin a pisaah an thukhawm a. Meeting-ah hian Parliamentary Secretary Pu TT Zothansanga pawh a tel.
MTDA thukhawm chuan ram chhung hmun dangte leh ram pawn atanga lokal khualzin veivakte tana Mizoram tlawh chakawm taka siam a nih theihna tura hmalakna hrang hrang an chhawp chhuahte chak taka bawhzui ni se an ti a. Heng an hmachhawp zingah hian Lunglenga Eco-Tourism leh Theme Park siamte, ke a kala zinvak duh te tan Aizawl-Reiek-Ailawng-a Trekking Route siamte, Chalfilh panna kawnga Trekking Route siamte, Phawngpui Tlang leh Sangau inkara Trekking Route siamte, leh Bilkhawthlir leh Phaisen inkara Tourist Circuit sak te pawh a tel a ni. Darlawn, Kanhmun leh Sakawrdai-a Tourist Lodge-te bakah Reiek-a Tourist Cottage pahnih hawnna tur sum mamawh te MTDA meeting-ah hian pawm a ni bawk.
Mizoram Tourism Development Authority-ah hian Tourism Minister chu Chairman niin Tourism Secretary chu Vice Chairman a ni a, Member Secretary chu Tourism Director a ni thung. MTDA dan (by-laws) chu a rang lama siamtha in Tourism Parliamentary Secretary chu Senior Vice Chairman a dah a ni bawk ang.
