Vawiin chawhma dar 11:00 khan Serchhip DC Conference Hall-ah Serchhip Bawrhsap, District Election Officer ni bawk Pi Juhi Mukherjee, IAS hovin National Voters’ Day vawi thumna hman a ni a, National Voters’ Day thutiam chhiar ho a nih bakah Booth Level Officer tha thlan chhuahte hnenah lawmman sem a ni a, EPIC thar a dawng tur te hnenah sem chhuah nghal a ni.
District Electoral Officer Pi Juhi Mukherjee chuan mizo tawnga thu sawiin National Voters’ Day hmang tura kalkhawm te chu chibai a buk a, EPIC dawng thar tur Electoral Roll a telh thar te fuihna thu sawiin, Electoral Roll a awm chu duh tawk mai lova, khua leh tui tha in a tih tur mawhphurhna thar an neih te hrechiang turin leh theihtawp chhuaha an tih tur pual te hlen chhuak ngei turin a fuih a, ram chhung leh pawn kaihhnawih thilpawimawh ah an thu leh hla te thu tlinga ngaih anih tawh avanga in chhuang tura hrilhin, India ram democracy peng pakhat an ni reng tawh dawn a ni a ti a, EPIC hian an hmalam hun lo kal leh zel turah ram tana ruahmanna siam kawngah remchang a siam sakin a tanpui zel tawh dawn a ni a ti a, thalaite chu ram nghahfak an nih thu hrilhin an thil tih na reng rengah rilru leh tih tak zet a hlawhtling ngei tura bei thin turin a chah bawk a ni.
Vawiin inkhawmah hian Serchhip District chhunga Assembly Constituency pathum a Booth Level Officer tha ber thlan chhuahte hnenah lawmman hlan an ni a, BLO tha thlanchhuahte chu :
1)Hrangturzo Constituency - Pu Lalengzauva (28/18), Teacher, Govt. Leng Middle School, Leng.
2)Tuikum Constituency – Pu H.Zatawna (27/21), Teacher, Govt. Lungpho High School, Lungpho
3)Serchhip Constituency – Pu Lalthakima Khiangte, Teacher, Govt. Serchhip Hr. Sec. School, Serchhip
Lawmman hi Pi Juhi Mukherjee, IAS, District Election Officer in a hlan a, lawmman hian Thuziak (Citation) leh tangka fai Rs. 2000/- a keng tel a ni.
BLO tha lawmman sem anih zawh hian EPIC semna hun hman a ni a, Serchhip khawpui chhunga atanga dawng thar tur mi 899 hnenah sem a ni.
Vawiin inkhawm hi Pi K.Vanlalruati, MCS, Election Officer in a kaihruai a, Pu Lalsangliana, MCS, Addl. DC in Chief Election Commissioner V.S. Sampath thuchah a chhiarchhuak bawk a ni. Electoral Roll a tel thar voters EPIC dawng tur leh BLO/DO thahnem tak he hun hmang hian an tel a ni.
