Vawiin hian Serchhip DC Conference Hall ah NEDP Multimedia Publicity Campaign hlawhtling taka buatsaih a ni a. Pu David L. Thangliana, Director, Information and Public Relations Department chu khuallian niin Serchhip District chhunga Department Officer thlan chhuah ten an hmasawnna chi hrang hrangte mipuite hnenah an hrilhfiah.

He Campaign Pu C. Lalnunkima, MIS, Dy. Director, I&PR kaihhruaiah hian khuallian Pu David L Thangliana chuan, tunlai khawvelah media a thangchakin mitinin an duh apiang thehdarh vel theihna an nei nasa tawh a. Chuvang chuan thu leh hla tin mai hi nitin a darh ur ur reng mai a ni. Chung thu leh hla darh zingah chuan sawrkar chunga lungawi lohna emaw sawrkar Department ten hna an thawh that loh chungchang emaw a tam em em a. Chung thute chhang chuan eng Department mahin an ka an ang ngai meuh lo. Thil chik ngai lemlo mi tam tak tan han awih sak maite a hlauhawm thin a ni. Chuvang chuan I&PR chuan sawrkar Department hrang hrangte hian kan ram mipui tan hna tam tak an thawkin,  hmasawnna lian tak tak min thlen pui reng a ni tih hi mumal taka mipuite hnena hrilhfiah thin hi tha a ti a, tun hnai kum hnih thum chhung leka India ram huapa lawmman dawng khawpa hma kan lakna sawi tur te hi a tam em em a ni, a ti. NEDP atangin hmalakna tur sawrkarin min pe hlauh bawk a, vawiinah Serchhipah pawh hetiang hun hi kan rawn hmang ta a ni, a ti a. Vawiin hi he Campaign Serchhip a a khuh hawnna anga ngaiin Media chi hrang hrang leh Project Site Visit hmangte in kan chhunzawm zel dawn ani, a ti bawk.

Pu R. Vanrengpuia, MCS, SDO Sadaar pawhin thusawiin Serchhip District chhungah hmasawnna hnathawh a tam em em a, Infrastructure lama kan than nasat ziate hi chhuanawm tham a tling ani, nimahsela mumal tak chung kan hmasawnna te han inhrilhhriata, khawtlang hruaitu hrang hrang te nena han sawi hona te neih a ni ngai lem lova. Vawiinah hetiang hun tha tak mai I&PR Department lamin an rawn buatsaih hi lawmawm ka ti a, Serchhip District ngai pawimawha Department hotu lu berin min rawn hmanpui hialte hi kan lawm hle a ni, a ti a ni.

Vawiina NEDP Multimedia Campaign ah hian Serchhip District chhunga Department Officer thlan chhuah mi sawm ten an Department kaltlanga tun hnai kum sawm vel chhunga hmasawnna hna an thawh hrang hrangte Power Point hmangin Presentation an nei a, he hun hmang tur hian Serchhip khawpui chhunga Village Council members zawng zawng, YMA, MHIP leh MUP Branch hruaitute, Sub Hqtrs YMA leh MHIP leh MUP hruaitute, Chanchinbumite leh sawm bik mi thahnem tak an tel a ni.