2125/2023-2024

Dated Serchhip, the 3rd October, 2023: Kum 2023 Inthlanpui atana inbuatsaihna kal zelah vawiin khan Serchhip District Election Officer chuan he inthlanpuia kawng hrang hranga mawhphurhna chelh tura a ruat Nodal Officer te ko khawmin Serchhip DC meeting Hall-ah vawiin khan training an nei.

Training hun kaihhruaitu Additional DC Pu James Lalnithanga chuan thu kamkeuna sawiin naktip nakthai maiah Election puan beisei a nih tawh avangin election inbuatsaihna kal chho mekah Nodal Officer ten kan mawhphurhna theuh tha taka hlen turin chak taka hmalak a tul a ni, a ti a. Election felfai leh muanawm a awm theih nan Nodal Officer zawng zawng ten kan mawhphurhna leh kan tih tur chin te hneh taka kan hriat a ngai a, Election kaihhnawihah hian tihtur a tam em em a, tihsual pheng phung awm palh thei a nih avangin fimkhur takin kan tihtur te taima takin kan hlen chhuak tur a ni, tiin Nodal Officer kalkhawm te a fuih a ni.

Serchhip District chhungah hian Assembly Constituency pathum - 26-Serchhip, 27-Tuikum leh 28-Hrangturzo te an awm a. Polling Station hi a zavaiin 88 a awm a ni. Nodal Officer hi tun dinhmunah DEO tiamin 13 ruat an ni.

Vawiin training-ah hian Subject hrang hrang hrut a ni a. District Level Master Trainer pahnih - Pu Gaston Vanlalhriatpuia, Settlement Officer, Serchhip leh Pu Lalhruailiana Zote, SDC, Serchhip ten kalkhawmte an zirtir a ni.

Election Commission of India duhdan angin election training hi kalpui chho zel a ni a. Election kaihhnawiha mawhphurhna chelhtu sawrkar official te bakah political party te tan pawh training hi buatsaih a ni ang.