Serchhip District chhunga SAGY hnuaia model village a siam tura thlan khaw pahnih - Khawlailung (Lok Sabha MP Pu CL Ruala thlan) leh Chhiahtlang (Rajya Sabha MP Pu Ronald Sapa Tlau thlan) khua te General Insurance Corporation of India in Corporate Social Responsibility Scheme kaltlanga a enkawlna tur project chu nimin dt.1.2.2016 khan Serchhip District Bawrhsap, SAGY Nodal Officer ni bawk Dr. Lalrozama, IAS chuan DC's Conference Hall-ah a hawng.

Project hawnna thu sawiin Bawrhsap chuan Mizoram MP pahnih Pu CL Ruala (Lok Sabha) leh Pu Ronald Sapa Tlau (Rajya Sabha) ten SAGY (MP Model Village) scheme hnuaia a hmasa ber atan Serchhip District a khaw pahnih Khawlailung leh Chhiahtlang an thlang chu thil chhinchhiahtlak tak a ni a ti a, he scheme kalpui mekah hian Sawrkar hnathawkte leh khawtual mipuiten an tih tur chin an hrechiang hle tih a hmuh thu leh chu chuan beiseina sang tak a pek thu a sawi bawk. Model Village atana thlan khua ten an mamawh leh Sawrkar hmalakna tur ruahmanna siam te chu "Material" thil vek a nih rual hian mipuite rilru a pawimawh tel hle a ni a ti a, mipuiten rilru dik leh thil tha duh tak takna thinlung, rilru chhungril hmasawnna an neih tel loh chuan hmasawnna awmze neilo a ni mai dawn a ni a ti a, thil kan ti a hma kan la anih vek vek chuan thahnemngai tak leh hlawhtlin tum ngei ngei a thawk tura hrilhin thil anihna dik tak pehhel chung leh thup nei chung a thawk lo turin leh huaisen taka ke pen turin a chah a, Model Village khua leh tui te chu entawntlak, inngaitlawm, hawihhawm leh midangte dawl zo tura chah in khaw thenawmte nen inkungkaihna nghet leh tha neih tum thin turin a chah a ni.

Pi Teresy Vanlalhruaii, MCS, Project Director, DRDA Serchhip pawhin thu sawiin Corporate Social Responsibility (CSR) awmzia leh CSR hnuaia tanpuina an hmuh dan te a sawifiah a, General Insurance Corporation of India hnuaiah heng SAGY khaw pahnih te hian Rs. Nuai 25 ve ve an dawng dawn a, hemi atang hian Rs. 12.5 lakh ve ve hmuh tawh a ni; heng tanpuina sum hman na tur atan hian Project 4 - Smart Classroom Initiative, Livelihood Assistance Project, Women Empowerment leh Clean Khawlailung / Clean Chhiahtlang Project te kalpui a ni dawn a ni.

Project thar hawnna ah hian District Bawrhsap in Smart Classroom Initiative Project hnuaia a hmasa ber atan heng SAGY khua a High School awm - Govt. Khawlailung High School, Govt. Chhiahtlang High School leh Millenium High School, Chhiahtlang hnenah Laptop, LCD Projector + Screen, Speaker a hlan theuh a, he Project hnuaiah tho hian Serchhip DIET kaltlangin heng khaw pahnih a zirtirtute hnenah IT applications training pek an lo ni tawh bawk a ni. Livelihood Assistance Project hnuaiah hian heng khaw pahnih atang hian BPL chhungkaw 10 ve ve thlanchhuah niin eizawnna atana an duhthlan ngei ah training tha tak pek an nih bakah an hlawhtlin ngei theih nan uluk taka vil zui reng tur a ni ang. Women Empowerment Project kaltlangin hmeichhiate an chanvo hrilhhriatna legal awareness campaign ngawrh taka neih tura ruahman anih bakah domestic abuse victim te tanpui an ni ang a, mipate pawh hmeichhiate humhalhna dan an palzut loh nan ziritirna pek an ni ang. Clean Khawlailung / Clean Chhiahtlang Project hnuai ah heng khaw pahnih tan hian bawlhhlawh thiar khawm leh paihna tur motor Truck pakhat ve ve pek an ni ang a, Village Council kutah hlan tur niin a enkawlna senso zawng zawng pawh an intodelh tur a ni ang. Heng SAGY khaw pahnih CSR Project hmanga tihchangtlunna tura ruahmanna Detailed Project Report pawh Village Council President te hnenah hian District Bawrhsap in a hlan nghal bawk.

Corporate Social Responsibility hi  Companies Act 2013 hnuaia India rama Company lian ten an hlawkna an hmuh atanga vantlang hmasawnna tura an luanchhuahna tura ruahman a ni a, General Insurance Corporation of India hi hi "Reinsurance Company" niin 1972 a din a ni a, an hmunpui ber chu Mumbai ah a awm a ni.

CSR Project hawnna inkhawm hi Pi Rohnuni Colney, Charge Officer, Chhiahtlang SAGY Village in a kaihruai a, Khawlailung leh Chhiahtlang Village Council President ten SAGY hnuaia hma an lak tawh dan leh hmasawnna an hmuh dan te sawina hun an hmang a, P. Thangsuahau, PMRDF hnen atang SAGY kaltlanga Sawrkar hmalakna hrang hrang te ngaihthlak niin Vaibhav, PMRDF in lawmthu sawina in hnu a khar a ni.