3850/2023-2024

Dated Serchhip, the 16th February, 2024: Vawiin khan District Horticulture Office, Serchhip buatsaih Thlai thar kut cum exhibition chu Pi K. Lalrinzuali, IAS, Secretary, Horticulture Department chuan Serchhip Bazar building ah a hawng.

Khuallian chuan thusawiin, mi taima kut hnathawktute hi an zahawm em em a, nasa takin an zar kan zo a ni tih hi hre thar zel ang u, tiin kalkawmte a sawm a. Kuthnathawktu hlawhtling tak takte hlawhtlinna hi sawrkar puihnaa innghat ni lovin an taimakna leh an rinawmnaa innghat a ni zawk, a ti a. Sawrkar in alo tih ve ber chu hnathawktu taima ten hlawk zawka an tharchhuah theih nan a tihdan phung zirtir hi a ni, a ti. Serchhip districta kuthnathawktute chu Mizoram chawmtu ni thei tura tan la lehzual turin a sawm a. Departmenta thawktute pawhin loneitute hi an mi pawimawhte an ni tih hriaa duat tura chahin, tha taka hna an thawh hian a rah chu loneitute atangin a lo lang thin a ni, a ti bawk.

Khual zahawm Pi M. Vanlalzami, Joint Director, Horticulture Department pawhin thu sawiin, Covid hri len lai pawha Mizoram mipuiten ei tur an tlakchham loh nana Supply chain kalpui anih lai khan Serchhipa kut hnathawktuten mipui ei tur an thawnchhuak nasa em em, khatih lai ai maha nasa zawk thar chhuak tura tan la zel turin loneitute a chah a ni. Thlai thar hun pangngaiah chuan tam tak kan thar chhuak a, a hralhna lamah harsatna a awm chang a awm fo thin, a thar hun pangngai ni lova thar chhuah hi a hlawk ber hunlai a ni tih hre tharin tam zawk thar tura tan la sauh sauh turin a chah a ni.

Loneitute aiawha thu sawitu Pu Lalramthara, Chairman, Agri & Horticulture Cooperation Society chuan thlawhhma an lak danah ram ngaw tichhe zawnga thlawhhma an neih ngai loh thu a sawi a. An hmalakna azara hnathawh tur leh hlawkna teltu mi thahnem tak an awm chu lawmawm a tih thu a sawi a. Sawrkar department hrang hrangin an puihbawm nasat zia sawiin lawmthu a sawi a ni.

He Exhibition-ah hian intihsiakna pathum- Floriculture, Vegetable leh Spices & Fruits ah buatsaih a ni a, mi 77 in an thlai tharte an pho chhuak a ni. An zinga a tha zual te hnenah lawmman 1-na atanga 3-na pawisa fai an hlan bawk a ni.

Hawnna inkhawm hi Pu R. Lalrintluanga, DHO Serchhip chuan a kaihruai a, sawrkar department hrang hrang hotu te, chanchinbu mite leh loneitute an tel a. Pu Biakhmingthanga, BHO, N. Vanlaiphai chuan lawmthu sawiin hun a khar a. Chawhnu dar 4:30 ah lawmman semna nei chhunzawm lehin kut hi khar a ni.