Serchhip District Legal Services Authority bul tumin vawiin chawhnu dar 2:00 khan Serchhip DC Office Chamber-ah Serchhip District Bawrhsap  Dr. Lalrozama, IAS hovin Serchhip District a a vawi hnih nan ‘Victims of Crime Compensation Scheme’ (Pawikhawihnaa a tuartu/victim ten zangnadawmna an hmuh theih dan tur) chungchang sawi ho a ni.

Vawiina thutkhawm ah hian Pi Lalrochami Ralte, MJS, Senior Civil Judge chuan Victims of Crime Compensation chungchang leh a dawn theih dante a sawi fiah a. Superintendent of Police, YMA Sub Headquarter Serchhip, MUP Sub Headquarter Serchhip bakah Serchhip District Consumer Association aiawhte an tel a ni.

‘Mizoram Victims of Crime Compensation Scheme 2011’ in ruahmanna a siam angin BPL chhungkuaa mi, misual kuta thite leh pawngsual tuartute chu zangnadawmna pek theih a ni a, a tuartu (Victim) ten vanduaina an tawh dan a zirin Rs. 50,000/- atanga Rs. 1,00,000/- thleng zangnadawmna (Compensation) hi pek theih a ni.

Vawiin thukhawm hian Serchhip District chhunga khaw pathum Chhingchhip, Serchhip leh Thenzawl atanga dilna lut pathum a ngaihtuah a, chung zingah chuan ni 28.8.2015 a Chhingchhip a Pu Kawldingliana fate hmeichhe naupang pahnih rawng taka an thah te tan compensation pek rem a ti a, vanduaina tawk hmeichhe naupang kum ruk mi (pawngsual leh thah) tan Rs. 1,50,000/- a nau zawk kum thum mi tan Rs. 1,00,000/- pek a remti bawk a ni. Hei bakah hian Serchhip a naupang pakhat kum 14 mi, ni 1.8.2015 a pawngsual tawk tan Rs. 50,000/- pek a remti bawk a ni.