Vawiin hi World Blood Donor Day (a thlawna midangte tana thisen petute Ni) a ni a, thupui atan ‘Every Blood Donor is a Hero’ tih hman niin khawvel pumpuiah hun hman a ni a, hetih rual hian Serchhip-ah pawh Association for Voluntary Blood Donation (AVBS) Serchhip Branch leh JN Hospital Blood Bank tangkawp buatsaihin chawhma dar 10:00 khan CMO Conference Hall-ah hun hman a ni a, District Bawrhsap Pu P.Lalchhuanga chuan khuallian niin a hmanpui a, mithiam thlan bikte’n thisen pek chungchang inzirtirna hun an hman bakah kum kalta chhunga thisen pe tam te hnenah lawmman sem a ni bawk.

He Ni hmanpuitu District Bawrhsap, Pu P. Lalchhuanga chuan thisen tel lova tumah kan dam khawchhuah theihloh thu sawiin, mi tlawmngai ten damlo a mamawh apiang ten a thlawna an hman theih tura Blood Bank-a thisen an pek thin avangin mi tam tak nunna chhan anih tawh thu leh amah ngei pawh midang ten thisen an pek avanga dam khawchhuak leh anih thu a sawi a, kan thisen pek te chu tu ten nge hmang dawn tih hrelo mah ila kan thisen pek hian mi tam tak nunna a chhan tawh tih hre reng turin kalkhawmte chu a chah a, thisen pek chu midangte tana nun chhanna anih avanga hna tha anih thu sawiin, mipuite chu hei hi chhunzawm zel tura chahin, a pawimawhna leh a tangkaina la hre velo te pawh zirtir zel turin vawiin a kalkhawm te chu a chah bawk.

Pu Rualkhuma, Treasurer, AVBD Serchhip Branch kaihhruai vawiin inkhawmah hian Dr. Lalhlunpuii, Blood Bank Officer, J.N Hospital Serchhip chuan thisen pek chungchang a hriattur pawimawh te zirtirna a pe a, Pu C. Zakunga, Secretary, AVBD Serchhip Branch pawhin report pein nikum April leh kumin March thla (April 2011 – March 2012) inkar chhungin JN Hospital-ah thisen Unit 685 pek anih thu leh heng zinga 34 te chu mi tute emaw tan bika pek anih thu a sawi a, a bak Unit 651 chu mi tlawmngai ten damlo a mamawh apiangte hman atan a thlawna an pek anih thu a tarlang in, hemi chhung hian a thlawna thisen pekna hun, Blood Donation Camp vawi 19 neih anih thu a sawi bawk.

He inkhawmah hian nikum April thla leh kumin March thla inkar chhunga midangte tana thisen pe tam te hnenah District Bawrhsap, Pu P. Lalchhuanga chuan chawimawina a hlan a, lawmman dawngtute chu : 1) Religious Group : 1st Serchhip Pastor Bial Thalai Kristian Pawl - Unit 66 ; 2nd Damdawi Veng Branch KTP, North Vanlaiphai - Unit 45 ; 3rd Serchhip Pastor Bial PYD - Unit 37 2) NGO Group : 1st Venghlun Branch YMA, Thenzawl - Unit 52; 2nd Serchhip Facebook User Group (SFUG) - Unit 45 ; 3rd IOC Veng Branch YMA, Serchhip - Unit 25 3) Institutional Group :1st NSS & Red Ribbon Club, Govt. Serchhip College - Unit 79 ; 2nd NSS, Govt. Higher Secondary School, Serchhip - Unit 74.

Vawiin a World Blood Donor Day pual inkhawm ah hian District Bawrhsap, Pu P. Lalchhuanga chuan Mizoram State Blood Transfusion Council in a thlawn a thisen pekna kawnga hma la tha te hnena chawimawina thuziak an siam chu JN Hospital Blood Bank, Serchhip-a Blood Bank Officer, Dr. Lalhlunpuii hnenah a hlan bawk a ni.