Chief Minister Pu Lal Thanhawla chuan vawiin khan Serchhip DC Confernece Hall-ah Serchhip khua zirlai kumin 2011 a HSLC leh HSSLC exam-a ti thate chawimawina hun Serchhip MZP Hqrs. buatsaih chu a hmanpui.

Chief Minister chuan MZP in mithahnemngaite atang leh mi thilphalte thawhlawm atanga hetiang zirlai ti tha chawimawina hun leh thilpek buatsaih a ni hi a zahawm a, a thianghlim a ni a ti a. Zirlaite chu ram hnuk in ni tiin, kohhran chu nghenchhanah hmangin inthlahdah lova an zirna ngaipawimawh reng turin a chah a. Lehkhathiam, educated ni tur hian faina te, insum theihna te, taimakna te leh hawihhawmna te an nei tel tur a ni a ti.

Chief Minister chuan kan thawhchhuah mil ang zelin khawsak kan tum tur a ni tiin, zirlaite pawhin nu leh pa te rilru tihah lova, an thawhchhuah ang zela khawsak zir turin a fuih bawk a. Mizote zingah sum zawn hmuh tum kan tam hle a ni tiin, sum hi zawn hmuh chi a nilova, a thawha thawhchhuah chi a ni a ti. Zirlai ni si, zana mut nachang hrelo,  zinga thawh nachang hre bawk silo, hnathawh leh mahni zirlai pawh zir tha peih lo te hi nakina ram hruai tu tur an nih theih a rinawm loh a ni a ti.

Lehkhathiam pun chhoh zel ang hian sorkar hna a pung ve dawn lova, chuvangin mahni state pawn lama hnathawh tur Malayalam mi te lo tih thin anga tih ve hi Zoram hmasawnna tichak theitu tur a nih a beisei thu Pu Hawla chuan a sawi a. Tun hnaiah College Lecturer ten sorkar sum dinhmun hre reng chunga zirlaite exam paper an en duh lo chu zirlaite hmakhua ngaihpawimawh lohna leh an career tihchhiat hnial lohna a ni a ti a, 'educationists tha an nih theih ka ring lo a ni' a ti. Kan tlin bak kan ti thei chuang lova, sorkar hnathawk te hian sorkar sum dinhmun hi an hriatchian a tul a ni a ti.

Chief Minister chuan zirlai ti tha chawimawina dawngte chu a lawmpui rualin a ti thalo te tanlak nana hmang tura a duhthu a sawi a. Ti tha zingah hmeichhia an tam zawk avangin mipa zirlai tan chona a ni a ti. Pu Hawla hian kumina HSLC leh HSSLC (Arts stream) a ti tha ber, topper te hnenah chawimawina thilpek a hlan a ni.

Chief Minister nupui Pi Lal Riliani pawhin thusawiin, hriselna atan zuk leh hmuam a hlauhawmzia uar takin a sawi a. Hmeichhe zirlai naupang te chu Mizo puan bih thin tura chahin amah ngei pawhin inah leh a kalna apiangah, ramdangah thlengin, puan a bih thin thu sawiin  hnamdang ten mawi an tih thin zia an hrilh thin thu te a sawilang a. Matric leh Plus 12 a topper te hnenah ban bun chi sana changkang tak a hlan bawk a ni.

Chawimawina neih ah hian zirlai 36 te hnenah Certificate Pi Lal Riliani leh Pu VL Kroshnehzova ten an hlan a, inkhawm hi Serchhip MZP Hqrs Lalramnghaka Kawlni in a kaihruai a, Pu H.Darzika, Serchhip DC in welcome speech a sawi bawk a ni.

Attachment

  • Loading attachment...