3920/2024-2025

Dated Serchhip, the 23^rd January, 2025: FOCUS Project a lo tawp dawn tak avangin vawiin khan Serchhip DC Pu Paul L.Khuma hovin Serchhip DC Pisapui Hall-ah FOCUS Exit Strategy meeting neih a ni a, loneitute hnenah FOCUS project kaltlanga hmasawnna ruhrel an din hrang hrang te an hlan a ni. 

DC chuan FOCUS project kalpui a nih chhunga Serchhip District khaw hrang hranga hmasawnna thleng chanchin chi 65 zet ngaihthlak tur a awm chu lawmawm a tih thu leh, thingtlang lo neih bansana lo hmun nghet neia inlet ta farmer engemawzat an awm chu FOCUS hlawhtlinna pholangtu a nih thu a sawi a. FOCUS Project chuan farmer te tan hmasawnna ruhrel rotling engemawzat a hnutchhiah tawh a, tunah chuan he project hi a lo tawp dawn tak avangin a enkawl zui hna chu a neitu dik tak loneitute kutah a awm tawh dawn a, theihtawp chhuaha tan an lak chhunzawm a ngai dawn a ni, a ti.  Pu Paul L.Khuma chuan Economic Survey-a a lan danin kum 2008-09 ah Mizoram chhunga agriculture leh a kaihhnawiha eizawngtute chuan State GDP za zelah 14 chauh an hauh phak laiin kum 2022-23 ah erawh chuan 20.15% ah an inhlang kai a, hei hian Sawrkar Laipui leh State Sawrkar hrang hrang te hmalakna a hlawhchham lo tih a nemnghet, a ti a. Amaherawhchu, hmasawnna tur tam tak kan la nei tih hriain FOCUS hi tawp mahse he project thiltum laipui ber a hlawhtlinna turin an thil zirchhuah te, hmanrua leh bungrua an chhawm te tangkai taka hmang turin a fuih a ni. 

FOCUS Deputy Director (Agri) Pu Lalhmingmuana pawhin thusawiin FOCUS kalpui a nih chhungin Serchhip District chu hma hruaitu an nih thu te, sawrkar laipuiah Mizoram hmel timawitu an nih fo thu a sawi a. FOCUS project zial fel a nih tawh dawn avangin line department te pawhin a theih ang anga chhawmdawl leh vil zui turin a chah a. FOCUS chhunzawmna turin PROSPER tih hmingpua Mizoram pum tuam thei tur project kalpui leh theih an inbeisei thu a sawi bawk. 

FOCUS kalpui a nih chhungin an hnathawh langsar zual zingah - Khumtung khuaa loneitu chhungkaw 80-te chu balhla a huhoa chin tirin thingtlang lo neih bansanin huan nghet neih tir an ni a. District chhung khaw hrang hrangah leilet nei chhungkaw 126 te leilet bial lian zawk siamsakin buh 147 MT zet an thar a. Leilet nei chhungkaw 64 te chu leilet thar hlak laihsakin buh 42MT an thar a. Khawlailung, Thenzawl leh Hmunthaah chhungkaw 80 te chu dragon fruit chin tirin thingtlang lo neih an bansan a. Leilet neitute tan tuikawng hmun hrang hrang 40 ah an siam a. Tuihna humhalh leh tihpun kawnga tan lain khaw 37 ah check dam an siam a. Serchhipah ran chaw siamna an bun a. Hualtu, Rullam, Sialsir leh Lungchhuan khuaah te IFS hmangin thingtlang lo neih bansana huan nghet nei turin chhungkaw 80-100 an pui a ni. 

Vawiin khan khaw hrang hranga loneitu intelkhawm Farmers Interest Group (FIG) te hnenah FOCUS hmanga hmasawnna ruhrel an din immovable assets te an hlan a. An hlan zingah hian check dam, water tank, agriculture link road, horticulture link road, farm link road,  ran chaw siamna mini feed mill, nursery, lei (bridge), water harvesting structure leh a dangte a tel a ni. 

Vawiin meeting hi District Project Manager Pu K Laltlanmawia’n a kaihruai a. FOCUS kalpui a nih chhunga Serchhip District-a an hmalaknate a tarlang a. Farmer te aiawhin Sialsir VCP Pu Vanlalrema, Lead Farmer ni bawk chuan thu a sawi a ni.