604/2024-2025

Dated Serchhip, the 30^th May, 2024: Vawiin khan District Level Committee on Green Mizoram chu an Chairman Pu David Lalthantluanga, Serchhip Bawrhsap hovin a pisaah an thukhawm a; Serchhip khawpuia Green Mizoram Day 2024 hman dan tur an rel.

State level Sub-Committee on Green Mizoram-in a lo rel tawh angin kumin June ni 11 hian District tinah Green Mizoram Day hi hman a ni leh dawn a. Kumin thupui atan “I nunna atan thing phun rawh” tih chu thlan a ni.

Pu David Lalthantluanga chuan Green Mizoram Day chu Mizoramah kum 1998 atang khan kum tin hman thin a ni a, he ni denchhen hian environment humhalh a tul zia leh mihringte dam khawchhuahna tura thing leh mau ti chereu lova, a phun belhtu nih a pawimawhzia inzirtir nana hun hman thin a nih thu a sawi a. Thingtiak phunte a puitlin ngei theih nan enkawl zui a pawimawh dan te a sawi a ni.

Meeting chuan Green Mizoram Day 2024 hawnna inkhawm chu DC Conference Hall-ah June ni 11, chawhma dar 11 ah hman ni se tiin an rel a. Serchhip DC Pu David Lalthantluanga chu khuallian atan beisei a ni. Hawnna inkhawmah hian environment humhalhna lam hawi thupui hmanga presentation nei turin Govt. Serchhip College atangin mithiam sawm ni se, programme chhim turin sawrkar hnathawkte leh tlawmngai pawl te bakah zirlai te sawm ni se, tiin an rel a ni.

Hawnna inkhawm neih zawhah a huhoa thingtiak phun a ni anga, a hmun atan Kikawn to Chhiatlang kawngpui dunga road reserve area chu thlan a ni a. Thingtiak chi hrang hrang -tlaizawng, chawnpui, april par leh a dangte phun tum a ni a. He ni denchhena pawl hrang hrang leh mimal thingtiak phun duh te tan pawh dilna hi Forest Department hotute hnenah thehluh theih a ni. Kum kaltaah khan Green Mizoram Day pualin Khawtetlangah thing tiak 427 phun a ni a, za zelah 85 vel an dam khawchhuak a. Pawl hrang hrang hnenah thingtiak 2301 an sem bawk a ni.

Green Mizoram Day 2024 puala inkhawmah hian District Level Award for Fire Prevention chu kangmei venna kawnga thawk tha Village Council te hnenah sem ni se tiin meeting chuan a rel bawk a ni.