3022/2024-2025

Dated Serchhip, the 15^th November, 2024: Sawrkar laipui Ministry of Social Justice and Empowerment hmalakna Prime Minister Dharti AAba Janjatiya Gram Utkarsh Abhiyan (PM-DAJGUA) chu Mizoram chhungah kalpui a nih dawn tak avangin Serchhip District ah pawh a chhawrtu tur mipui ten PM-DAJGUA awmzia leh an tana a tangkai dan tur an hriat theih nan November ni 15 atanga ni 26 chhung hian inhrilhhriatna hun IEC Campaign neih a ni dawn a. Vawiin khan Serchhip DC Pu Paul L.Khuma chuan Serchhip DC Pisapui Hall-a programme buatsaihah khuallian niin IEC Campaign hi a hawng a ni.

Khuallian chuan mipui mimir te hmasawnna tur scheme tha tak Central Sawrkarin a rawn buatsaih leh ta chu lawmawm a tih thu a sawi a. He scheme hlawhtlinna turin Serchhip District mipuite leh sawrkarin thawhhona tha tak neih a tul thu te, department tin te an pawimawh thu sawiin he scheme hnuaiah Serchhip District tan ruahmanna (plan) tha tak siam i tum ang u, tiin kalkhawmte Pu Paul L.Khuma chuan a sawm a ni.

Sawrkar chuan PM-DAJGUA hmang hian hnam hnufual (tribal) te ni tin khawsak leh eizawnna dinhmun siamthaa, tribal chhungkua leh tribal tamna khua te, aspirational block-a khua te, tribal population tam tak awmna hmunah te an mamawh zualpui phuhru a, chawikan vek a tum a ni. He scheme hmang hian Tribal tamna khaw thlanbikte intodelhna kawnga tanpui leh an hmunhma tihchangtlun a ni ang a. He Scheme kalpui hun chhung hi kum 5 a ni dawn a, kum 2024-25 atanga 2028-29 thleng kalpui a ni dawn a ni. Development Action Plan for Scheduled Tribe (DAPST) sum te haichhuah loh a tam em em a. Mipui mimirin tangkai lehzuala an hman theih nan he scheme thar hmang hian sum tam tak haichhuah belh tum a ni a. PM Gati Shakti Dashboard atangin digital in hmalakna te vil a ni ang. Ministry tinte tana target siam a, budget ruahmmna fel tak duan an i dawn a, hun tiam chhunga a nih tur ang nih tir hman an tum dawn a ni. 

District Level Committee (District Dharti Aaba Unit) din a ni a, he Committee ah hian Serchhip DC chu Chairman a ni. Khaw 5 bawr vel theuhah thenin Block Level Implementation Team din a ni dawn a.  He scheme a hlawhtlin theihna turin Research Institute te, ITDA te, khawtlang hruaitu te, tlawmngai pawl hruaitu te a tam thei ang ber an tel dawn a.  District level-ah DPR buatsaih a ni anga, State pawmpui turin thehuh a ni dawn a ni.

Vawiin programme hi Additional DC Pu Lalrinzuala’n a kaihruai a. SDO (Sadar) Pi F.Lalnisai chuan a scheme kalhmang a sawifiah a ni.