1459/2023-2024

Serchhip, the 11th August : Vawiin khan Serchhip DC thar Pu David Lalthantluanga chuan Serchhip khaw chhunga tlawmngai pawl hruaitute nen DC Conference Hall ah meeting pawimawh tak an nei a, District hmasawnna atana an ngai pawimawh te an sawi ho a ni.

Pu David Lalthantluanga chuan Serchhip District a DC hna a zawm hnuah a vawikhatna atan Serchhip District huam chhunga tlawmngai pawl hrang hrang aiawh te nen inkawmhona hun an hmang thei chu lawmawm a ti a. Kohhran leh khawtlang hruaitute chu sawrkar kut ke pawimawh tak an ni a, heng pawl hrang hrang te leh mipui mimir tawiawmna tha hi District hmasawnna atana pawimawh ber te zinga mi a ni, a ti. Kan hma lawkah inthlanpui kan hmachhawn dawn a, chuta tan chuan summary roll revision a kal mek tih sawiin DC chuan Serchhip District chhunga vote thlak rual tawh phawt chuan vote an thlak theih nan te, inthlanna felfai leh thianghlim a awm theihna turin tlawmngai pawl leh mipui te thawhhopuiah a sawm a ni.

NH 54 kawngpui siam mek chungchangah DC chuan he kawngpui siam avangin khaw tam takah nunphung a buai hle tih an hriatpui thu a sawi a. Kawng tha nei thei tur chuan harsatna engemaw chen tawh loh theih loh a nih avangin tuar hram hram turin mipui te a ngen a. Sawrkar laipuiin kum thar February thla chhunga hna hi zo vek turin contractor te a hriattir a, a hmawr an bawk tep tawh tih a sawi. Pu David Lalthantluanga chuan kawngpui siam mek chungchangah hian zangnadawmna sum la thei tura assessment tih loh palh lo awm pawh chinfel niin heng mi te hian zangnadawmna (compensation) hi an dawng ngei dawn tih meeting-ah hian a sawi bawk. DC kal ta te an lo tawiawm tawh ang bawkin Serchhip mipuite thawhhopuiah Serchhip DC thar chuan a sawm a. Kan hma lawka Independence Day lo awm turah pawh tel theuh turin mipuite a sawm a ni.

Vawiin meeting ah hian MPF, MHIP, MUP, YMA, MZP, MJA leh Joint VC aiawh te an tel a. Heng pawl hrang hrang aiawh te hian thu sawiin an pawl dinhmun leh kalphung te an sawi fiah a. Khawtlang mamawh hrang hrangte DC hnenah hian an thlen nghal bawk a. DC Pu David Lalthantluanga chuan harsatna leh mamawh an thlen te lo enzui pui a tum thu a sawi a ni. DC hoa tlawmngaipawl aiawhte inkawmkhawmnaah hian Additional DC Pu James Lalnithanga leh District Information and Public Relations Officer Pi Lalnunmawii te pawh an tel a ni.