2466/2025-2026

Dated Serchhip, the 17^th September, 2025: Tukin zing dar 7:30 khan Serchhip Bazarah Serchhip DC Pu Paul L Khuma chuan Faina Beihpui -Swachhta Hi Seva a hawng a, Faina Hnatlang neih zui nghal a ni.

Pu Paul L Khuma chuan Serchhip District hian faina lamah hma kan hruai a, Mizoram Cleanliness Competition-ah pawh tum hnih lai pakhatna dinhmun kan lo luah tawh a, District khawpui fai ber kan nih leh ngei theihna turin mipuite kan tanrual a ngai a ni, a ti.

Serchhip Sub-Headquarters YMA President Pu Kawlthuama pawhin faina kawnga tan lak a tulzia sawiin Serchhip khaw mipuite leh chhungkawtinte faina ngai pawimawh turin a sawm a ni.

Swachhta Hi Seva hawnna inkhawm hi PHE Senior EE Pu Isaac Lalchhuanmawia’n a kaihruai a. Serchhip Joint VC President Pu R Sanghmingthanga’n lawmthu a sawi a. Faina hnatlangpui neih chhunzawm nghalin Serchhip bazar, Tuikhuah Veng  leh Hospital kawngpuite tihfai hnatlang neih a ni.

October 2 thleng awh tur Swachhta Hi Seva hman dan tur nimin khan Serchhip DC Pu Paul L Khuma hovin Serchhip Meeting Hall ah rel a ni a. September ni 25 hian School, College, Institution hrang hrang te, Hospital te, Office te leh vantlang hmun pawimawh tihfai hnatlang neih a ni anga. Village Council zawng zawngah faina hnatlangpui neih a ni anga. September 19 ah sanitation worker te tan Serchhip Hospital-ah Free Health Camp buatsaih a ni ang.

Serchhip District chhung khaw tinah Swachhta Hi Seva kalpui a ni anga. Hmun bal zual lai bik - black spot tihfai a ni anga. Thenzawl leh North Vanlaiphai Civil Sub Division ah te SDO (C) te kaihhruaiin Swachhta Hi Seva hi hman a ni bawk ang.