Pu C. Rosangmawia, District Civil Supplies Officer, Serchhip District chuan Serchhip District chhunga eirawngbawlna Gas (LPG) sem chungchanga mipuite hriattirna a hnuai ami ang hian a chhuah-
Kan hriat tlan theuh angin tunhnaiah Mizoram hmun thenkhata mipuiten LPG an dawn mumal loh avangin harsatna an tawk a. He thil thleng hi Mizoram Sawrkar mawhphurhnaa ngaiin, Sawrkar dem zawnga thuchhuah leh hmalakna a tam hle. Hemi chungchanga thil awmdan dik chu a hnuai ami ang hi a ni e.
Mizoram hian hmun hnih - Borkhola LPG Bottling Plant leh Mualkhang LPG Bottling Plant atangin LPG kan la lut thin a, Bottling Plant atanga a semna tur hmuna LPG thiar chhuah leh phurh thlen (supply & transportation) hna hi Indian Oil Corporation Ltd. (IOCL) lamin tender kovin, a thiartu tur contractor an thlang thin a ni. IOCL hi corporation niin, Mizoram Sawrkar hnuaia awm an ni lova, tin, LPG thiar chhuah leh phurh thlenna (supply & transportation) rate tender koh leh thlan chungchangah hian Mizoram Sawrkar emaw State dang Sawrkar emaw an inrawlh thei lova, an thuneihna huang a ni lo hrim hrim a ni.
Serchhip, Lunglei, Saiha, Mamit leh Champhai te hian Mualkhang Bottling Plant atangin LPG kan la thin a. LPG phur tur hian Contactor 0.1283 Rs/Cylinder/RTKM (dated 14.10.2015)a chhangtu thlan an ni a. Hei hi rate hmasa i.e. 0.1695 Rs/Cylinder/RTKM (dated 14.12.2012) aia a hniam avangin contractorte hian phurhna tur motor an hmu zo ta meuh lova, mipuiten harsatna kan tawk ta a ni.
Heng harsatna hi Mizoram Sawrkar chuan a hmuh hmaih lovin, a ngawihsan lova. Vawi tam tak IOCL lama thuneitu sang zawk leh Sawrkar Laipuia Ministry of Petroleum lama thuneitute nawrin, Mualkhang BP atanga LPG phurhna rate hi a thara tender tha turin a lo ngen fo tawh a ni. He thu kal zelah hian ni 30.1.2018 khan IOCL hotute chu Pu H.L. Rochungnunga, IAS, Secretary, FCS&CA Department office-ah, Department Officer-te nen Meeting neihpui an ni a. Hemi hunah hian IOCL lam atangin Deputy General Manager (LPG-S) te, Plant Manager, Mualkhang BP te leh Supply Officer (LPG-S) te an rawn kal a. He Meeting-ah hian thu tam tak rel niin, chak taka hmalak zui nghal a ni a, a hnuaia tarlan hi point pawimawh deuh deuh te an ni-
1. Mizoram Sawrkar, FCS&CA Department Truck hmanga LPG phurh/thiar chungchang rel a ni a. IOCL lamin a ranglama remtihna an pek turin ziaka dilna thawn nghal a ni.
2. IOCL lamin Mualkhang BP atanga LPG phurhna tur rate an tender thar dawn tih thu dawn a ni a. Hei hi a rang thei ang bera zo fel tur leh workable rate ngei hmang tawh turin IOCL lama thuneitute ziaka ngen nghal an ni.
3. Serchhip leh Lunglei areas te, Mualkhang BP atanga Borkhola BP hnuaia sawn (transfer/attach) tura dilna pawh IOCL thuneitu sang Executive Director hnenah ziaka thlen nghal a ni.
4. Nikum fur kawng chhiat zual laia, Mualkhang BP atanga LPG phurtute hnena FCS&CA Department-in support price a lo pek tawh chu, tun dinhmunah pek leh turin hmalak nghal a ni bawk.
IOCL hi Mizoram Sawrkar thuhnuaia awm chu ni se LPG chungchanga harsatna hi a awm lo vang. Heti chung hian Mizoram Sawrkar hian LPG chungchanga mipuite harsatna sukiang turin theihtawp a chhuah thin a, a chhuah mek a, a chhuah zel dawn a ni. Mipuite pawhin hei hi kan hriat tlan a, Sawrkar hmalakna kan ngaihchan thiam a tul hle a ni.
