4349/2024-2025

Dated Serchhip, the 19^th February, 2025: Vawiin khan Serchhip District Agriculture Marketing Committee (DAMC) chu an Chairman Pu Paul L Khuma, Serchhip DC hoin DC meeting Hall-ah an thukhawm. Naktuk February ni 20, 2025 atang hian Secondary Collection Centre ah sawhthing lei tan a ni tawh dawn a. Sawhthing lei chungchanga ruahmanna te vawiin hian member ten an sawi ho a ni.

Serchhip District ah hian Secondary Collection Centre pasarih (7) a awm a. Heng SCC pakhat zel atan hian DAMC chuan supervisor a ruat a. Heng Supervisor te hian Co-ordinator te nen thawkhoin ruahmanna leh tul ang ang an sawiho thin dawn a. Naktuk sawhthing hralh tan ni ah hian Supervisor ten an bial theuha SCC te an tlawh dawn a ni.

Serchhip DC Pu Paul L.Khuma, DAMC Chairman leh Pu Lalchharliana, DAMC Member Secretary te chuan naktuk hian Chhiahtlanga SCC an tlawh dawn a. Sawhthing lei khawm sa te hi programme tawi buatsaihin an vailiam dawn a ni.

Sawrkarin ruahmanna a siam angin Serchhip District ah hian thla khat chhungin sawhthing kg 5,25,000 lei a ni dawn a. Chumi senso tur atan Serchhip District tan Rs.2,62,50,000 a ruahman a. Farmer te bank account-ah Direct Benifit Transfer hmangin sawhthing leina pawisa hi thun zel a ni ang.

Vawiin meeting-ah hian DAMC Chairman Pu Paul L.Khuma chuan sawrkar policy hlawhtlinna turin thawhhona tha a pawimawh a. Thawktu zawng zawng te tangrual a, inpawhtlang taka harsatna awm thei apiangte inhrilhtawn zel a tul a ni, a ti a. Felfai taka sawhthing lei leh hralh te kalpui a nih theih nan Action Plan mumal tak siam a tul thu DC chuan a sawi a. Meeting chuan Serchhip District bialtu Co-ordinator chu Action Plan siam turin a ruat nghal a ni.