4038/2024-2025 

Dated Serchhip the 31^st January, 2025: Village Council Inthlanpui 2020 ah khan Serchhip District ah za zela tehin 80.6 vote a tla a. Kumin inthlanah hian 90% vote a tlak theih nan Serchhip District Election Officer Pu Paul L.Khuma hoin tan lak a ni dawn a. Vawiin khan ruahmanna hrang hrang thlirin DC Meeting Hall-ah thutkhawm pawimawh neih a ni. 

Serchhip DC Pu Paul L Khuma chuan inthlanah vote a tlak that chuan democracy a chak tihna a ni a; vote a tlak that theihna tur hian DEO office chuahin hma an la thei lo a, khawtlang hruaitute leh mipui mimirte nena tanho a pawimawh em em a ni, a ti. 

DEO chuan chhungtinte hnenah vote thlak tura ngenna lehkha a thawn dawn a. Serchhip District a vote nei, zirna leh thil dang vanga District pawna awm te pawh social media kaltlanga lehkha thawnin, vote thlak turin a sawm dawn a. Heng sawmna te hi a dawng tur ten an dawn ngei theih nan YMA, MHIP leh MJA ten an tanpui dawn a ni. 

MPF te chu kum upate leh harsatna dang vanga Polling Station thleng theilote tanpui tura ngen an ni a. Polling Booth pathum thlang chhuakin Government Serchhip College Electoral Literacy Club te chuan help desk an siam dawn a. Vote thlak chungchanga zawhna leh hriat duh nei te an tanpui dawn a ni.  

Social media kaltlangin kar thar atangin ni tin e-flyer siamin vote thlak tura inzirtna slogan hrang hrang thehdarh reng a ni dawn a. Sector Magistrate te leh VLO ten an bial theuhah Intense Monitoring Team an din ang a, inelna thianghlim an neih theih nan Best Voter Turnout award siam a ni dawn a. Polling Station tinah Booth Ambassodor siamin Self Help Group ten Mizo hnam incheia incheiin vote thlak turin mipuite an sawm dawn bawk a ni.  

Field Veng chu Queue less Polling Station atan thlan a ni a. Rei tak tak vote thlak tura intlar leh nghah ngai loin chhungtin ten vote an thlak hun tur hun bi siam sak an ni dawn a. YMA te tanpuinain Poll Day hmain chhungtinte an hriattir dawn a ni.  

Vawiin meeting-ah hian Election Officer Pi F Lalnisai leh DIPRO Pi Lalnunmawii bakah YMA, MHIP, MJA leh VLO te an tel a ni.