No.7239/2020-2021

Vawiin hian Serchhip DC Meeting Hall ah District Task Force Committee on Immunization te chu an Chairman Pu Kumar Abhishek, IAS Serchhip Bawrhsap hovin an thukhawm a. Naktuk dar 10 atangin Covid19 frontline workers te hnenah COvid19 vaccine, Covishield pek tan an rel.

Pu Kumar Abhishek chuan Covid19 vaccine Serchhip a pekchhuah tan a ni tur chu lawmawm a tih thu a sawi a. Sawrkarin ruahmanna a siam angin frontline workers te hnenah he vacccine hi pek hmasak tur a ni a, Serchhip tan a vawi khatnaah hian dose 450 a rawn thleng a, hei hi naktuk dar zing dar 10 atangin Serchhip Presbyterian English School ah leh Midland Middle School ah a dawngtu tura thlan frontline workers mi za ve ve te pek an ni dawn a ni, a ti a. A tukleh ah pawh heng centre pahnih ah hian mi za ve ve pek an ni leh ang a, Thenzawl CHC ah mi 50 hnenah pek an ni bawk ang, tiin he vaccine pek chhuah dan tur tlangpui hi a sawi a, dose dang a lo thlen leh hunah N. Vanlaiphai Civil Sud Division lamah tan ve leh a nih tur thu a tarlang bawk a ni. Bawrhsap chuan engkim fel taka kalpui a tul tih sawiin Security duty te, medical duty te leh a dawngtu turte hriselna dinhmun hriat hmasakna (checklist) te duan vek a tul tih a tarlang bawk.

He hunah hian Dr. Laldawngliana Sailo, CMO chuan Serchhip District a Vaccine pekna tur Centre an thlanchhuahte an buatsaih dan report a pe a, engkim peih fel a nih tawh thu leh a dawngtu tura thlante pawh Centre an thlen hun turte hrilh vek an nih tawh thu a sawi.

Dr. Lalhlunpuii, SMO pawhin Covishield Vaccine Mizoram hmun danga an pek chhuah tawh dan tlangpui report pein Covishield chu tuna India rama covid19 vaccine an pek chhuah pahnih zinga state tam zawk ten an hman mek a nih thu a sawi a. India ram state 23 ah he vaccine hi pek a ni, a ti. 

He meeting ah hian Pu Kulothungan, IAS, SDO Thenzawl, Pi Dorothy Muansangi, MCS, SDO, N. Vanlaiphai leh committee members dangte an kal tha hle a ni.