346/2024-2025 

Dated Serchhip, the 24th April, 2024: Nimin khan Serchhip DC Conference Hall-ah Serchhip District Anti-Tobacco Squad Meeting Cum Training neih a ni.

He hun hi Session hnih a then niin, session hmasa zawk hi Pu David Lalthantluanga, Deputy Commissioner & Chairman Serchhip District Anti- Tobacco Squad kaihhruaina in neih a ni a. DC chuan hripui leng avangin hun engemaw chen meeting neih theih a nih tawh loh hnuah meeting nei leh theih a ni ta chu lawmawm a tih thu sawiin, squad member kal zawng zawng te chungah lawmthu a sawi a ni.

Serchhipah hian Food & Drug Administration, Legal Metrology leh Traffic police te nen  tangkawpin Anti Tobacco Squad drive neih thin a ni, tih meeting ah hian tarlan a ni a. Kum 2023-2024, sawrkar kum chhung khan Serchhip ah Anti Tobacco Squad drive vawi 29 neih niin puipunna hmuna meizu, dan bawhchhia mi 92 man an ni a, an pawisa chawi tling khawm hi Rs 5580 a ni.

Session khatnaah hian rorel niin an thu pass te chu:-

1.Anti-Tobacco Squad drive hi a tam thei ang ber neih tum ni se, hetah hian Police lam te an tel zel theih nan drive neih hma niah SDPO(squad member) hnenah Police dilna thlen thin ni se.

2. Anti-tobacco Squad ID siam thar nise.

3. World no tobacco day thupui “Protecting children from tobacco industry interference” a nih avangin Serchhip District chhung School tin ah hman ni se, tih te an rel a ni.

Then hnihna hi Dr.LP Malsawma, Sr.CMO kaihhruaina hnuaiah neih niin DC Pu.David Lalthantluanga chuan thu a sawi a. Zuk leh hmuam dona kawnga thawktu te, a bik takin National Tobacco Control Programme a thawktu te hmalakna a tha thawkhat hle tiin DC chuan an chungah lawmthu a sawi a, theihtawp chhuah zel turin a fuih a ni.

Dr.Lallawmkimi Chhakchhuak, District Nodal Officer, NTCP pawhin thusawiin “Mizo siam Zozial, sahdah ,tuibur te leh ram thenawm Myanmar leh Bangladesh atanga dan lova vaihlo leh a kaihhnawih man tlawma rawn lut thin te avang hian kan ram chhungah vaihlo a tam phah niin a lang a, heng product ah te hian COTPA  in a phut ang tarlan a nih ngai loh avangin dan kenkawh hi a pawimawh tak zet a, chumi kengkawhtu tur te kan nih avangin  dan  kan hriat hi a pawimawh em em a ni” a ti.

Pi Sarah Laldintluangi, Assistant Director, Food & Drug Administration chuan Food Safety Standards Act (FSSA) chungchang power point presentation a nei a. Pi K. Hmingthansangi, District Consultant, NTCP chuan Vaihlo khuahkhirhna dan COTPA leh Tobacco Control Laws chungchang zirtirna a pe bawk a ni.