No.7141/2020-2021

Vawiin hian Serchhip SP Conference Hall ah District Crime Review neih a ni a, kum hnih kaltaa district chhunga Police Department hnathawh hrang hrangte thlirletna leh infuih tharna hun te neih a ni.

He hun hi Pu PC Laltanpuia, MPS, Addl. SP in a kaihruaia, kum hnih kalta, 2019 leh 2020 chhunga dan bawhchhia an man dan leh Court lama an umzui dan report pe in, Serchhip districta kum 2019 chhunga Case Register zawng zawng hi 100 niin Charge Sheet 97, Final Report 3, Convict 53, Discharge 4 leh Pending Trial 40 a ni a. Kum 2020 chhunga Case Register hi 83, Charge Sheet 64, Final Report 1, Pending Investigation 18, Convict 25, Discharge 1 leh Pending Trial 38 a ni. Kum 2019 chhunga case register tam ber chu MLP Act bawhchhia niin 23 register a ni a, a dawtah mi rawk (Burglary) niin 21 register a ni a, a pathumna chu rukruk niin case 20 register a ni. Kum 2020 chhunga case register tam ber chu rukruk (theft) niin 24 chhinchhiah a ni a, a dawtah mi rawk (burglary) niin 12 register a ni a, a pathumna chu MLP Act bawhchhia niin case 11 register a ni. Protection of Children from Sexual Offences (POCSO) Act, hnuaiah kum 2019 chhungin case 4 register a ni a, kum 2020 ah case 6 ziahluh a ni bawk.

Chawhma lamah hian Pu K. Saitluanga, MIS, DIPRO, Serchhip in Police Public Relations chungchang zirtirna leh infuih tharna hun a hmang a, Pi JH Lalparmawii, MJS, Legal Service Authority, Serchhip chuan thubuai Court lama umzui kawnga thil pawimawh zirtirna hun a hmang bawk a. Chawhnu lamah Pu Kaste Romalsawma, MPS, SDPO in kum kaltaa an hmalakna thlirletna a neihpui a, chumi hnuah Branch hrang hranga mawhphurtu officer ten an enkawl branch report pein sawihona an nei zui a ni.