1429/2026-2027 

Dated Serchhip, the 17^th July 2026: Vawiin khan Serchhip District Disaster Management Authority chu Chairman Serchhip District Deputy Commissioner Pu Paul L. Khuma hovin DC Meeting Hall-ah an thukhawm a, tun hnaia Serchhip District chhunga khuarel chhiatna thleng hrang hrangte dinhmun sawi ho niin, chhiatna (Disaster) thleng zel thei laka inven dan tur te, chak zawka chhawmdawlna hna thawh dan turte leh department hrang hrangte inkara thawh hona tha zawk a awm theih dan turte sawi ho a ni.

Vawiin meeting-ah hian SDC Pu Vanthangpuia hnen atangin Disaster Management Act 2005 hnuaia District Disaster management Authoriry te thuneihna leh mawhphurhna hrang hrangte ngaihthlak niin, Disaster laka mipuite him theih nana, danin thuneihna leh mawhphurhna a pek, dan zawm tha duh lotute chunga hremna awm thei chi hrang hrangte pawh tarlan a ni bawk. Serchhip District chhunga  Zonal Officer hrang hrangte leh Police, PWD, PHE, P&E, Health, RD&AD hotute hnen atangin an hmalakna report ngaihthlak a ni a, tun dinhmunah nunna chan phah hialna khawpa chhiatna lian tham (major incident) thleng a awm lo a ni. 

Serchhip District-ah chhiatrupna a lo thlen palha ranga taka chhawmdawlna hna thawk turin Police Department hnuaiah Search & Rescue Team din fel a nih tawh thu leh, Medical lam buaipuitu tur Rapid Response Team pawh din fel a ni tawh thu vawiin meeting-ah hian tarlan a ni bawk.

Deputy Commissioner Pu Paul L. Khuma chuan department hrang hrangte inkarah thawh hona tha tak a awm chu lawmawm a tih thu sawiin department hotute leh Zonal officer- te chu an bial tinte uluk lehzuala vil zui (monitor) turin a chah a; mipuite beiseina leh thlamuanna thlen theitu an nih hre renga, thahnemngai taka thawk zel turin a sawm bawk a ni.