Vawiin hian Serchhip District Congress, 2017 chu P&E YMA Hall ah buatsaih a ni a, Pu K. Saitluanga, MIS, DIPRO, Serchhip chu khuallian niin District chhunga School hrang hrang atangin zirlai naupangten Science Project intihsiakna an nei.

He huna khuallian Pu K. Saitluanga chuan, Science lama hriatna a thanharh hma chuan mihringte nunkawng hi tihpalh thil (accident) in a kaihruai nasa a, ziaktu thenkhat phei chuan mei (fire) pawh tihpalh thila hmuhchhuah niin an sawi. Amaherawh chu Science zirna lama hmasawnna chuan thil nihphung, nunphung, kawnghmang leh kal zel dan tur zirchhuah thiamna te, mamawh thil thar siam chhuah thiamna te min pe ta a. Mihring hmasawnna chu nasa takin a thang chhova, tun hun Science thiamna sang tak hmanga inrelbawlna hun hi kan thleng chho ta a ni. Science thiamna ngaina ram apiang an dingchhuak hmasain, an ropui hmasa a ni ta ber a, keini pawhin science thiamna kan ngaihhluta kan uar zia zelin hmasawnna rahbi kan rap chho zel dawn a nih hmel a ni, a ti a. Kumina Children Science Congress theme atana Science, Technology & Innovation for sustainable Development tih thlan a nih angin science thiamna hmanga kan tu kan fa, chhuan lo la awm zel turte tana chenna tlak khawvel din kawngah kan thiamna te kan hman chhoh deuh deuh a tul thu a tarlang a, zirlai naupang kalkhawmte chu nakina scientist ropui tak an nih theih nan vawiina an zirlai te chu thil pawimawh ber a nih thu a chah bawk.

He hunah hian Pu Lawmawma, DEO Serchhip pawhin thusawiin, zirlai naupang thiam belh zel duha tuihal hmel hmuh tur tam tak an awm thin chu lawmawm a tih thu sawiin, zirna tluka ram siam thatna, ram hmasawnna, mimal changkanna tha thildang a awm chuan loh thu a sawi a. District chhunga school hrang hrang atanga zirlai kalkhawm te chu an theihtawpa an zirlai te bei a, hlawhtling ngei tura hmalam pan tum turin a chah a ni.

District Level Children Science Congress hi RMSA leh Science Teacher Association of Mizoram (STAM) te tangkawpin an buatsaih a nih thu he hu kaihhruaitu Pu PC Vanlalluna, DY. DPC, RMSA Serchhip chuan sawiin, district dangah neih hlawm tawh niin henga titha thlan chhuahte chuan State Level Congress ah inelna an nei leh anga chuta titha thlan chhuahte chuan National Children Science Congress ah Mizoram aiawh in an tel chho zel dawn a ni. Tin, he Congress ah hian Pu Saihmingliana Sailo, Serchhip District Coordinator, STAm pawhin report pein Science Congress neih dan leh a kal chhoh zel dan tur sawifiahna a nei bawk.

Vawiina Serchhip District Children Science Congress ah hian District chhung School pali atangin Team pakua (9) ten an Science Project te entir intihsiakna an nei a a ni.