Vawiin hian Serchhip District Traffic Management Committee chu an Chairman Pi Sangchhin Chinzah, Serchhip Bawrhsap ni bawk hovin an thukhawm a,  tun hnaia Serchhip khawpui hmun thlan bika Parking fee khawn tan tak kalpui dan an thlir let.

Pi Sanchhin CHinzah chuan, Serchhip khawpui chhung bikah State Transport Authority ruahman angin a tum khat nan parking fee kan han khawn tan a, lirthei neitute leh thuneitute ngei tan pawh thil tih fuh tawk loh te, han siam rem hlek ngai thil tea wm thei a nih avangin ni 10 hnu velah thlirletna hun buatsaih a ni, a ti a. He mi chhunga harsatna awm ang ang te vawiin hian kan sawi ho dawn a ni, a ti.

Vawiina meeting hian, Auto Rickshaw neitute leh Pick-up neituten an harsatna an rawn thlen te ngaihtuah a ni a, an harsatna neihte hi collector leh anmahni inkara chinfel mai theih nia a lan angin District Transport Officer kaihhruaina hnuaiah lo inbia se tia rel a ni. Tin, parking fee pumpelh duh vanga khawpui chhung kawngkam thenkhata lirthei dahtute chungchang ngaihtuah a nih bakah, District Hospital Area a No Parking Area khauh zawka kenkawh dan tur te, a hungna siam dan tur te, road marking thar zawk a tulna hmuna siam dan tur te leh Collector retender tul pakhat la awm mek umzui dan turte pawh vawiin hian sawi nghal a ni.

He meeting ah hian SP Pu Lalringdika leh State Transport Authority Member Pu Lalramliana Sailo te,  bakah District traffic management Committee member te leh lirtheia eizawng pawl aiawh te an tel a ni.