No.4348/2020-2021 

Dated Serchhip, the 21st August, 2020: Vawiin hian Serchhip DC Meeting Hall ah District Level Co ordination Committee on African Swine Fever te chu an CHiarman Pu Kumar Abhishek, IAS, DC hovin an thukhawm a, NE State thenkhata nasa taka leng mek Vawk pul hri (African Swine Fever) laka invenna te, a lo thlen palha hmalak dan tur ruahmanna te an thlir.

Chairman Pu Kumar Abhishek chuan, African Swine Fever in Mizoram a luhchilh loh nana sawrkar thupek chhuah te tha taka zawm tum turin mipuite a ngen a, a luhchilhna state ah te loneituten an ran an chan nasat avangin kan fimkhur tlan hle a tul a ni, a ti. Tin, Serchhip District ah pawh inbuatsaihna tha tawk tak kalpui a nih thusawiin, hetianga inbuatsaihna tha a awm theih nana thawktu AH & Vety te inpeknaah lawmthu a sawi a ni.

Member Secretary Dr. C. Zarzokima, DVO chuan African Swine Fever chungchang leh thenawm State ten an tawrh mek dan tlangpui a sawi a. Assam state ah vawk 17000 vel thi tawhin, Arunachal Pradesh ah vawk 4000 vel an thi tawh bawk. Thla hnih kalta vel atang khan Meghalaya ah hmuh ve leh a ni a, Meghalaya ah hian vawiin thlengin vawk 70 velin an thih pui leh tawh tih a sawi a. Mizoramah la hmuh ni chiah lo mahse invenna kalpui a nih dan a tarlang bawk. Serchhip District bikah chuan tunah hian thenawm states leh ram atanga Vawk lakluh khapna thupek District Magistrate Order chu a nung mek a, he order hi Police Department ten chak taka kengkawhin tlaivar ten duty thin a nih thu a tarlang a ni. Tin, he Vawk pul hriin min luhchilh palha District chhung inbuatsaihna pawh sawiin Dr. C. Zarzokima chuan, kumin May thlaah khan District Rapid Response Team din a nih tawh thu a sawi a, he hri vei vawkte chu Serchhip dai Mualvawm rama Slaughter House ah phur khawm zel tura ruahman niin an thih pawha an ruang him taka phum bona hmun tur pawh ruahman fel vek tawh a nih thu a sawi bawk.

Committee hian hri chungchang mipuite hnena zau zawka zirtirna pek tha an tih thu an sawi a, hemi atan hian thuneitu sang zawkah ruahmanna thehluh mek a nih thu leh Awareness hi May thlaah daih tawh khan a thawhkhatna kalpui a nih tawh thu a tarlang bawk a ni.

Meeting ah hian Pu R. Sathiyasundaram, SP, Pu Lalmuansanga Ralte, Addl. DC, Pu Vishal Sah, IAS District Training neia Serchhip a awm mek, leh Co-ordination Committee members te an tel kim hle a ni.