Vawin nileng khan Serchhip DC's Conference Hall-ah "MP" Model Village (SAGY) pahnih Khawlailung (Lok Sabha MP) leh Chhiahtlang (Rajya Sabha MP) a hmalak anih dan thlirho in District-Level Empowered Committee on SAGY chu an Chairman Dr. Lalrozama, IAS Serchhip bawrhsap ni bawk hovin an thukhawm.

District Bawrhsap chuan SAGY programme hnuaia bultanna atana Lok Sabha MP Pu CL Ruala leh Rajya Sabha MP Pu Ronald Sapa Tlau ten Serchhip District chhunga khaw pahnih Khawlailung leh Chhiahtlang an thlan avanga lawmthu sawiin hemi chungchanga Department hrang hrangte hmalakna ah lawmawm a tih thu a sawi a, engmah entawn tur awmlo anih vangin arkhawthim dai tak meuh a kal a ngai a, heti chunga tha taka hma an la thei chuan an thahnemngaihna leh inpekna a tilang chiang hle a ni a ti bawk. Department hrang hrangte hmalakna sawiho a hmalak chhunzawm dan tur inhriatpui te a pawimawh bakah thawhhona tha neih nan te pawh a pawimawh hle a a hriat thu a sawi bawk a ni.

Pi Teresy Vanlalhruaii, Project Director, DRDA pawhin thu sawiin Department hrang hrangte hmalakna avangin India rama SAGY programme kalpui tha ber te zingah Serchhip District chu an tel ve ani tiin lawmthu a sawi a, hmalak chhunzawm zelna tur tam tak la awm ah pawh theihtawp chhuah a tan la sauh sauh turin Department hrang hrangte a ngen a ni.

Vawiin thutkhawmah hian SAGY hnuaia Model Village atana puan khaw pahnih te a hmasawnna hna thawktu Department hrang hrang 28 ten an hmalakna powerpoint hmanga entirna pe in, an hmachhawp te bakah harsatna an tawh te an tarlang a, Khawlailung leh Chhiahtlang khawtlang hruaitute pawh telin hriatthiam loh leh hriat belh duh inzawhna hun hman a ni bawk.

Attachment

  • Loading attachment...