1214/2023-2024

Dated Serchhip, the 21st July, 2023: Vawiin khan Serchhip DC Meeting Hall ah District Level Task Force on Ruihhlo Do chu Social Welfare Minister Er. Lalrinawma hovin an thukhawm.

Minister chuan ruihhlo in kan ram nasa taka min run mek thu sawiin, ruihhlo dona atan hian sawrkar chuan Chief Minister kaihhruaina hnuaiah Ruihhlo Do Core Committee dinin Social Welfare and Tribal Affairs Minister kaihhruaina in Working Committee din leh a nih thu a sawi a. Ruihhlo dona atan hian thuang thuma hmalak niin Supply Reduction, Demand Reduction leh Harm Reduction anih thu a sawi. Kan ram thenawmah ram buai a awm mek a, chumi remchanga la chuan kan rama ruihhlo lakluh hi a hluar zual bawk si a, midang kuta dah mai leh sawrkara thawktute kutah chauh dah mai a hun tawh lova, kan zaa kan tan tlan a hun tak zet a ni, tiin District Level atanga Village level thlenga hma kan lak a ngai a, ruihhlo hian min luhchhuah vek tawh a, a do hna thawka kan thawhchhuah hian midang tan nilovin keimahni tan ani tih rilru kan put a tul a ni, a ti.

Pi Lalhlupuii Sailo, CEO, MSD & RB chuan ruihhlo dona atana inzirtirna hi nitin zirna in leh Sunday School ah naupang zinga hmalak anih thu a sawiin, Serchhip District chhungah engtin nge hma kan lak ang tih chu District ah rel a ngai a ni, a ti. Hmalakna atan hian Booklet siam a ni a, demand reduction bik atan cheng nuai 5 ruahman a nih thu a bawk.

Thutkhawm kaihruaitu District Bawrhsap leh District Level Task Force on Ruihhlo Do Chairman Pi Nazuk Kumar chuan kumin May 24-a thutkhawm an lo neih tawha an thurel te tarlangin, Master Trainer mi 4 lo ruat tura YMA te tih an nih thu leh heng mite hi training pek an nih hnuah Awareness Campaign neih tum a nih thu a sawi a. District Education Officer (DEO) in Awareness Campaign neihna tur School 9 lo thlang tura tih an nih thu leh CMO in School hrang hranga Awareness Campaign an neih ah ruihhlo dona chungchang pawh kalpui nghal nise tih a nih thu a sawi bawk.