No.7281/2020-2021

Vawiin hian Mizoram Youth Commission leh Commerce & Industries Department buatsaih Covid19 vanga state danga hnathawk lo haw te puala Entrepreneurship Development Training, ni thum awh kharna hun I&PR Conference Hall-ah buatsaih a ni a, Bawrhsap Pu Kumar Abhishek, IAS chu khuallian a ni.

Pu Kumar Abhishek chuan, Covid19 hripui leng vanga state dang atanga kan thalai lo kirte tana mahnia eizawnna bul tan dan inzirtirna hun buatsaih a ni chu lawmawm a tih thu a sawi a. An hlawkpui ngei a beisei thu leh an thil zirte a taka umzui ngama, theihtawp chhuah zui turin a fuih a. Hetiang thil buatsaihtu MYC leh Commerce & Industries thawktute chungah lawmthu a sawi a ni.  Bawrhsap hian he training chhimtu covid19 vanga hna chan lo haw mi 22 te hnenah Certificate hi a hlan nghal a ni.

Training-ah hian Entreprenuership awmzia leh Business lama bul tan dawna thil pawimawhte zirtirna Dr. Jonathan Lalnunsiama, Asst. Prof., Govt. Serchhip College, Master Trainer, ESD chuan a zirtir a ni. A kharna hun hi Pi Elizabeth Lalremthangi Hmar, FM, DIC Serchhip in a kaihruaia, heng migrant workers te tan hian skill development training lam pawh buatsaih leh tum a nih thu a tarlang a ni.