2019/2023-2024

Dated Serchhip, the 25th September, 2023: Serchhip District din champhaphak vawi 25na l chu vawiin khan Serchhip DC Pu David Lalthantluanga hovin Serchhip DC Conference Hall ah lawm a ni.

DC Pu David Lalthantluanga chuan Serchhip District in kum 25 hmel a hmu ta chu lawmawm a tihzia sawiin he District lo pian theihna tura hma la tu zawng zawng te leh Serchhip District mipuite chungah lawmpuina a hlan a ni. Kum 1998 atangin kum 25 chhungin Serchhip District hian hma a sawn nasa hle a, Department hrang hrang 31 lai an awm tawh a, ziak leh chhiar thiam kawngah phei chuan India ram pumah pakhatna a ni, a ti a. Hmasawnna ruhrel tam tak din a nih dan te; zirna, eizawnna leh khawsakna kawngah nasa taka hma an sawn thu a sawi a. Chutihlai erawh chuan tun hnai chhoah Serchhip District chhungah HIV/AIDS leh damdawi hman khawlohna a hluar chho mek chu a pawi tak zet a; hei hi do hneh turin sawrkar mai bakah tlawmngai pawl, kohhran te leh mipui kan tanrual a ngai a ni, Pu David Lalthantluanga chuan a ti.

Kum 1984 atanga bul tanin Serchhip khawtlang hruaitute leh mi thahnemngai ten Serchhip District a pian theih nan hma a la tan a. Kum 1986 sawrkar thar a lo pianin Joint Action Committee for District Headquarters, Serchhip din niin he pawl hming hian July ni 2, 1987 khan sawrkarah District dilna thehluh a ni a. Kum 1990 Special Committee on Re-organisation of Districts and Sub- Division, Serchhip chu siam a lo ni leh a. He pawl hian chak takin hma a la a. Mizoram a District re-organisation atan rawtna an thehlut a, Mizoram hi District 5 ah then ni se tiin an rawt a. Ramri leh map te pawh fel taka siamin ni 27.8.1990 khan sawrkarah Serchhip Town Special committee hmingin lehkha an thehlut a. Mizoram khaw pawimawh hrang hrang ah te campaign-in an in tir chhuak bawk a ni.

Kum 1996 ah chuan Serchhip District Headquarters Demand Committee siam leh a ni a. Committee vawi tam tak neih niin Mizoram chu District 8 ah then ni se tiin ngaihtuahna an hmang a. Map te siamin District 8 boundary tur leh headquarters tur te theuh nen ziahlan a ni a. He proposal hi ni November ni 17, 1997 ah sawrkarah thlen a ni a. July ni 29, 1998 khan sawrkarin District thar siamna tichhuakin Aizawl District chu District 3 - Aizawl District, Aizawl North District leh Aizawl South District ah then a ni phawt a. June ni 3, 1999 ah District thar siam te hming thlak danglam lehin, Aizawl South District chu Serchhip District tia vuah a lo ni ta a ni. DC Office hi September ni 15, 1998 ah hawn a ni a, Deputy Commissioner hmasa ber chu Pi Lalkungi Hnamte a ni a. Vawiin thleng hian DC 15 an awm tawh a ni.

Serchhip District hian India rama District zawng zawngah ziak leh chhiar thiam tamna ber dinhmun a luah mek a. He District chhungah hian Sub Division pathum - Serchhip, Thenzawl leh N. Vanlaiphai te a awm a. RD block hi pahnih - Serchhip leh East Lungdar te a awm. Thingtlang khaw 40 leh Notified Town pathum a nei a.

Serchhip District Silver Jubilee lawmna program ah hian Serchhip DRDA Project Director hna lo chelh tawh Pu H.Dolianbuaia, Serchhip Adl. DC kal chhuak Pu Lalmuansanga Ralte te bakah Serchhip DC office a lo thawk thin te, Serchhip District a pian theihna tura hma la tu Demand Committee leh khatih hunlaia VC lo ni tawh thin te he hunah hian an tel a. DC office tualzawlah Silver Jubilee lungphun chu DC Pu David Lalthantluanga’n a hawng a ni.

Vawiin programme ah hian Serchhip District lo pian theihna tura hma latu, hruaitu hmasa te hnenah memento hlan a ni a. SDO (Sadar) Pi Rebecca Laldinmawii Hrahsel Serchhip District din tan dan chanchin a sawi a. Addl. DC Pu James Lalnithanga’n lawmthu sawiin hun hnung a khar a ni.